Пошук


05.07.2010 01:00  
Год І

ПЕРШАЕ ЧЫТАННЕ

Зых 3, 1–6. 9–12

З’явіўся Анёл Пана ў полымі агню з сярэдзіны куста

Чытанне кнігі Зыходу.

У тыя дні:

Майсей пасвіў авечак цесця свайго Етры, святара мадыянскага. І завёў  ён авечак далёка ў пустыню, і прыйшоў да Гарэба, Божай гары. І з’явіўся яму Анёл Пана ў полымі агню з сярэдзіны цярновага куста. І бачыў ён, як куст палаў агнём, але не згараў.                                   

І сказаў Майсей: Падыду я бліжэй і пагляджу на гэтую вялікую з’яву: чаму куст не згарае. Убачыў Пан, што ён наблізіўся, каб паглядзець, і паклікаў яго з сярэдзіны куста, кажучы: Майсей, Майсей.

Той адказаў: Вось я.

І сказаў Бог: Не набліжайся сюды, здымі абутак з ног тваіх, бо месца, на якім ты стаіш, гэта святая зямля.

І сказаў яшчэ: Я — Бог айца твайго, Бог Абрагама, Бог Ісаака, Бог Якуба.

І схаваў Майсей твар свой, таму што баяўся паглядзець на Бога.

І сказаў Пан: Вось крык сыноў Ізраэля дайшоў да Мяне, і Я ўбачыў уціск іхні, якім егіпцяне прыгнятаюць іх. Але ідзі, Я пашлю цябе да фараона, каб ты вывеў з Егіпта народ Мой, сыноў Ізраэля.

І сказаў Майсей Богу: Хто я, каб ісці да фараона і выводзіць сыноў Ізраэля з Егіпта?

Пан адказаў: Я пайду з табою. І вось знак таго, што Я паслаў цябе: калі выведзеш народ з Егіпта, паклоніцеся Богу на гэтай гары.

Гэта слова Божае.

аРЭСПАНСАРЫЙНЫ ПСАЛЬМ

Пс 103 (102), 1–2. 3–4. 6–7 (Р.: 8а)

Рэфрэн: Міласэрны ёсць Пан і ласкавы.

21. Благаславі, душа мая, Пана, *
і ўсё нутро маё, імя Яго святое.
22. Благаславі, душа мая, Пана *
і не забывай пра ўсе Яго дабрадзействы.

Рэфрэн:

23. Ён адпускае ўсе беззаконні твае *
і вылечвае ўсе твае хваробы.
24. Ён жыццё тваё ратуе ад загубы, *
літасцю і міласэрнасцю цябе карануе.

Рэфрэн:

6. Пан здзяйсняе справядлівасць *
і правасуддзе для ўсіх прыгнечаных.
7. Ён паказаў шляхі свае Майсею, *
сынам Ізраэля — справы свае.

Рэфрэн:
а

Год ІІ

ПЕРШАЕ ЧЫТАННЕ

Іс 10, 5–7. 13–16

Ці ж хваліцца сякера перад тым, хто ёй сячэ?

Чытанне кнігі прарока Ісаі.

Так кажа Пан:

О, асірыец, розга Майго гневу;
кій у руцэ яго — гэта Маё абурэнне!
Я пашлю яго да бязбожнага народа
і супраць народа гневу майго аддам яму загад,
каб узяў здабычу і дашчэнту абрабаваў,
каб кінуў яго на патаптанне,
быццам вулічны бруд.
Але ён не думае так
і яго сэрца так не лічыць.
Аднак у яго сэрцы згуба
і знішчэнне шматлікіх народаў.
Бо скажа:
Я ўчыніў гэта сілаю маёй рукі
і мудрасцю сваёй, бо я разумны.
Я перастаўляю межы народаў
і рабую іхнія скарбы;
скідаю тых, хто сядзіць на тронах, нібы асілак.
Мая рука знайшла, быццам гняздо, багацце народаў.
І як збіраюць кінутыя яйкі,
так я сабраў усю зямлю.
І ніхто не паварушыў крыламі,
і не адкрыў дзюбы, і не піснуў.
Але ці хваліцца сякера
перад тым, хто ёй сячэ?
Ці ж ўзвышаецца піла
над тым, хто яе цягне?
Быццам розга можа трасці тым, хто яе трымае,
або кій можа падняць таго, хто не дрэва.
За гэта Пан, Бог Магуццяў,
пашле знямогу на тлустых яго,
і пад ягонай славай
загарыцца жар, нібы полымя агню.

Гэта слова Божае.

аРЭСПАНСАРЫЙНЫ ПСАЛЬМ

Пс 94 (93), 5–6. 7–8. 9–10. 14–15  (Р.: 14а)

Рэфрэн: Пан не адкіне свой народ.

5. Топчуць народ Твой, о Пане, *
прыгнятаюць спадчыну Тваю;
6. забіваюць чужаземца і ўдаву, *
сіротаў кідаюць на смерць.

Рэфрэн:

7. І кажуць: Пан не бачыць, *
Бог Якуба не звяртае ўвагі.
8. Апамятайцеся, неразумныя сярод народу, *
калі вы паразумнееце, недасведчаныя?

Рэфрэн:

9. Ці ж той, хто стварыў вуха, не пачуе? *
І той, хто зрабіў вока, не ўбачыць?
10. Ці той, хто настаўляе народы, не асудзіць, — *
той, хто вучыць чалавека разуменню?

Рэфрэн:

14. Бо Пан не адкіне свой народ *
і не пакіне спадчыны сваёй.
15. Бо суд звернецца да справядлівасці, *
а за ім і ўсе, хто правы сэрцам.

Рэфрэн:

а

СПЕЎ ПЕРАД ЕВАНГЕЛЛЕМ


Акламацыя: Аллелюя, аллелюя, аллелюя.
пар. Мц 11, 25
Благаслаўлёны Ты, Ойча, Пан неба і зямлі,
бо Ты адкрыў таямніцы Валадарства дзецям.

Акламацыя: Аллелюя, аллелюя, аллелюя.
аЕВАНГЕЛЛЕ
Мц 11, 25–27

Ты схаваў гэта ад мудрых і адкрыў гэта дзецям

+ Чытанне святога Евангелля паводле Мацвея.

У той час, адказваючы, Езус сказаў: Праслаўляю Цябе, Ойча, Пан  неба  і  зямлі, што Ты схаваў гэта ад мудрых і разумных і адкрыў гэта дзецям. Так, Ойча, бо такая была Твая добрая воля. Усё перададзена Мне Айцом Маім, і ніхто не ведае Сына апроч Айца; і ніхто не ведае Айца, апроч Сына і таго, каму Сын захоча адкрыць.

Гэта слова Пана.


Пераклад здзейснены Секцыяй па перакладзе літургічных тэкстаў і афіцыйных дакументаў Касцёла пры ККББ

Абноўлена 22.06.2017 22:48
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Спагадлівасць - гэта праява Божай
Міласэрнасці, адзін з сямі дароў Святога Духа