Пошук


05.07.2010 01:00  
Год І

ПЕРШАЕ ЧЫТАННЕ

Быц 46, 1–7. 28-30

Цяпер я магу памерці, таму што ўбачыў аблічча тваё

Чытанне кнігі Быцця.

У тыя дні:

Ізраэль вырушыў разам з усім, што было ў яго, і, прыбыўшы у Бээр-Шэбу, прынёс там ахвяры Богу бацькі свайго Ісаака. І Бог прамовіў да Ізраэля ў начным бачанні, кажучы: Якубе, Якубе! Той адказаў: Вось я. І сказаў яму: Я – Бог, Бог бацькі твайго. Не бойся пайсці ў Егіпет, бо там Я зраблю цябе вялікім народам. Я сам пайду з табою ў Егіпет, і выведу цябе назад, а Юзаф закрые рукою сваёю твае вочы.

Тады Якуб выправіўся з Бээр-Шэбы. Сыны Ізраэля пасадзілі свайго бацьку Якуба, і дзяцей ягоных, і жонак ягоных на калясніцы, якія фараон паслаў, каб прывезці яго. Узялі з сабою ўсю маёмасць, якую мелі ў зямлі ханаанскай. І прыбылі ў Егіпет Якуб і ўсе нашчадкі ягоныя, сыны ягоныя і ўнукі, дочкі і ўнучкі разам з усім патомствам. А Юду ён паслаў перад сабою, каб той паказваў шлях да Гашэна. І прыбылі яны да зямлі Гашэн.

Юзаф жа запрог калясніцы свае і скіраваўся насустрач бацьку свайму ў Гашэн. Калі ўбачыў яго, кінуўся яму на шыю і доўга плакаў на шыі ягонай. І сказаў Ізраэль Юзафу: Цяпер я магу памерці, таму што ўбачыў аблічча тваё і ты яшчэ жывы.

Гэта слова Божае.

аРЭСПАНСАРЫЙНЫ ПСАЛЬМ

Пс 37 (36), 3–4. 18–19. 27–28. 39–40  (Р.: 39а)

Рэфрэн: Збаўленне справядлівых паходзіць ад Пана.

3. Спадзявайся на Пана і чыні дабро; *
жыві на зямлі і захоўвай вернасць.
4. Радуйся ў Пану, *
і Ён споўніць жаданні твайго сэрца.

Рэфрэн:

18. Пан ведае дні беззаганных, *
і спадчына іх будзе трываць вечна.
19. Не будуць асаромлены ў ліхую часіну, *
і ў дні голаду насычаны будуць.

Рэфрэн:

27. Ухіляйся ад зла і чыні дабро, *
і будзеш жыць навекі.
28. Бо Пан любіць правасуддзе †
і не пакідае сваіх верных, *
яны навекі будуць захаваны,
а патомства бязбожнікаў будзе знішчана.

Рэфрэн:

39. Збаўленне справядлівых паходзіць ад Пана, *
Ён — цвярдыня іхняя ў час уціску.
40. Пан ім дапаможа і ўратуе, †
Ён вызваліць іх ад грэшнікаў і збавіць, *
бо яны на Яго спадзяюцца.

Рэфрэн:
а

Год ІІ

ПЕРШАЕ ЧЫТАННЕ

Ос 14, 2–10

Не будзем больш казаць «нашы багі» пра справы нашых рук

Чытанне кнігі прарока Осіі.

Так кажа Пан:

Вярніся, Ізраэль, да Пана Бога свайго,
бо ўпаў ты ў беззаконні сваім.
Вазьміце з сабою словы
і навярніцеся да Пана.
Скажыце Яму: Прабач усё беззаконне,
а добрае прымі,
і мы адплацім ахвярай нашых вуснаў.
Асірыя не ўратуе нас,
мы больш не будзем ездзіць на конях,
не будзем больш казаць “нашы багі”
пра справы нашых рук,
бо ў Цябе сірата знойдзе спагаду.
Я вылечу іхнюю нявернасць,
сардэчна палюблю іх,
бо адвярнуўся ад іх Мой гнеў.
Я буду для Ізраэля нібы раса.
Ён расквітнее, як лілея,
і пусціць карані свае, як Лібан.
Разрастуцца галіны яго,
і краса ягоная будзе як у алівы,
а пах яго — нібы ад Лібана.
І вернуцца тыя, хто сядзеў у ягоным цені,
і ажывуць, як зерне,
расквітнеюць, як вінаград,
і будуць згадваць пра яго, як пра лібанскае віно.
Эфраім, якая табе справа да ідалаў?
Я пачую і дагледжу цябе.
Буду як зялёны кіпарыс,
ад Мяне будзе твой плод.
Хто мудры, няхай гэта зразумее,
хто разумны, няхай ведае гэта.
Бо простыя шляхі Пана,
і справядлівыя будуць хадзіць па іх,
а грэшнікі на іх спатыкнуцца.

Гэта слова Божае.

аРЭСПАНСАРЫЙНЫ ПСАЛЬМ

Пс 51 (50), 3–4. 8–9. 12–13. 14 і 17 (Р.: 17b)

Рэфрэн: Вусны мае будуць абвяшчаць Тваю хвалу, Пане.
3. Змілуйся нада мною, Божа, у вялікай міласці Тваёй *
і ў паўнаце міласэрнасці Тваёй знішчы беззаконні мае.
4. Абмый цалкам мяне ад правінаў маіх *
і ачысці мяне ад граху майго.

Рэфрэн:

8. Ты палюбіў глыбокую праўду, *
і навучыў мяне тайнай мудрасці.
9. Акрапі мяне ісопам, і буду чысты, *
абмый мяне, і стану бялейшы за снег.

Рэфрэн:

12. Чыстае сэрца ствары ўва мне, Божа, *
і аднаві ўва мне трывалы дух.
13. Не адкінь мяне ад свайго аблічча *
і не пазбаў мяне Духа Твайго Святога.

Рэфрэн:

14. Вярні мне радасць збаўлення Твайго *
і ўмацуй мяне духам прыхільным.
17. Пане, адкрый мае вусны, *
і вусны мае будуць абвяшчаць Тваю хвалу.

Рэфрэн:

а

СПЕЎ ПЕРАД ЕВАНГЕЛЛЕМ

Ян 16, 13а; 14, 26d
Акламацыя: Аллелюя, аллелюя, аллелюя.

Калі прыйдзе Дух праўды, навучыць вас усёй праўдзе
і нагадае вам пра ўсё, што Я сказаў вам.

Акламацыя: Аллелюя, аллелюя, аллелюя.
аЕВАНГЕЛЛЕ
Мц 10, 16–23

Не вы будзеце гаварыць, а Дух Айца вашага

+ Чытанне святога Евангелля паводле Мацвея.

У той час:

Езус сказаў сваім Апосталам: Вось Я пасылаю вас, як авечак паміж ваўкоў. Таму будзьце хітрыя, як змеі, і простыя, як галубы. Сцеражыцеся людзей, бо будуць аддаваць вас на суд і ў сінагогах сваіх будуць біць вас. І павядуць вас да кіраўнікоў і да каралёў з-за Мяне дзеля сведчання перад імі і язычнікамі. Калі ж будуць выдаваць вас, не турбуйцеся, як або што сказаць, бо дадзена будзе вам у тую гадзіну пазнаць, што сказаць.

Бо не вы будзеце гаварыць, а Дух Айца вашага гаварыць будзе ў вас. І выдасць брат брата на смерць, і бацька сына; і паўстануць дзеці на бацькоў і заб’юць іх. І ўсе будуць ненавідзець вас за Маё імя. Хто ж вытрывае да канца, будзе збаўлены.

Калі вас пераследаваць будуць у гэтым горадзе, пераходзьце ў другі. Сапраўды кажу вам, што не пройдзеце гарадоў Ізраэля, як прыйдзе Сын Чалавечы.

Гэта слова Пана.


Пераклад здзейснены Секцыяй па перакладзе літургічных тэкстаў і афіцыйных дакументаў Касцёла пры ККББ

Абноўлена 22.06.2017 22:48
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Спагадлівасць - гэта праява Божай
Міласэрнасці, адзін з сямі дароў Святога Духа