ПЕРШАЕ ЧЫТАННЕ
Уратаваў жыццё беднага ад рукі злачынцаў
Чытанне кнігі прарока Ераміі.
Ерамія сказаў:Я чуў пагалоскі многіх:
Страх навокал!
Выкрыйце, і мы выкрыем яго!
Усе, што былі ў згодзе са мною,
чакаюць падзення майго:
Можа, удасца, – яны кажуць, – падмануць яго,
тады пераможам яго і адпомсцім яму.
Але Пан са мною, як магутны волат,
таму ганіцелі мае спатыкнуцца і скарáцца.
Пасаромяцца сваім падзеннем,
і будзе ім вечная і непазбыўная ганьба.
Пане Магуццяў, які выпрабоўваеш праведніка,
Ты глядзіш на задумы і сэрца,
прашу, каб я ўбачыў Тваю помсту над імі,
бо я адкрыў Табе сваю справу.
Спявайце Пану, праслаўляйце Пана,
бо Пан уратаваў жыццё беднага
ад рукі злачынцаў.
Гэта слова Божае.
аРЭСПАНСАРЫЙНЫ ПСАЛЬМ
Рэфрэн: Пачуй мяне, Пане, у вялікай сваёй міласэрнасці.
8. Дзеля Цябе я цярплю знявагу, ганьба твар мой пакрыла.*
9. Я стаў чужым для братоў маіх, чужынцам для сыноў маёй маці.
10. Бо руплівасць аб доме Тваім з’ядае мяне, *
і знявагі тых, хто Цябе зневажае, упалі на мяне.
Рэфрэн:
14. Я ўзношу да Цябе маю малітву, Пане, у час ласкавасці, Божа. *
Пачуй мяне ў вялікай сваёй міласэрнасці,
у праўдзе Твайго збаўлення.
17. Пачуй мяне, Пане, бо шчодрая міласць Твая, *
глянь на мяне паводле вялікай дабрыні сваёй.
Рэфрэн:
33. Убачаць убогія і ўсцешацца, †
і ажыве сэрца тых, хто шукае Бога. *
34. Бо Пан слухае бедных і не пагарджае вязнямі сваімі.
35. Няхай славяць Яго зямля і нябёсы, *
мора і ўсё, што рухаецца ў іх.
Рэфрэн:
аДРУГОЕ ЧЫТАННЕ
З дарам ласкі не так, як са злачынствам
Чытанне Паслання святога апостала Паўла да Рымлянаў.
Браты:
Як праз аднаго чалавека грэх увайшоў у свет і праз грэх — смерць, так і смерць перайшла на ўсіх людзей, бо ўсе зграшылі. Бо і перад Законам грэх быў у свеце; але грэх не залічваецца, калі няма Закону. Аднак смерць валадарыла ад Адама аж да Майсея нават над тымі, хто не саграшыў падобна злачынству Адама, які ёсць правобразам будучага.
Але з дарам ласкі не так, як са злачынствам. Бо калі праз злачынства аднаго памерлі многія, то дзякуючы ласцы аднаго чалавека, Езуса Хрыста, нашмат больш ласкі Божай і дару сышло шчодра на многіх.
Гэта слова Божае.
а СПЕЎ ПЕРАД ЕВАНГЕЛЛЕМ
Дух праўды будзе сведчыць пра Мяне, — кажа Пан, —
але і вы таксама будзеце сведчыць.
Акламацыя: Аллелюя, аллелюя, аллелюя.
аЕВАНГЕЛЛЕ
Не бойцеся тых, хто забівае цела
Чытанне святога Евангелля паводле Мацвея.
У той час:
Езус сказаў сваім Апосталам: Не бойцеся людзей, бо няма нічога схаванага, што б не адкрылася, і нічога патаемнага, што б не стала вядомым. Што кажу вам у цемры, гаварыце на святле, і што на вуха чуеце, прапаведуйце на дахах. Не бойцеся тых, хто забівае цела, душы ж не могуць забіць; а бойцеся больш таго, хто можа і душу, і цела загубіць у геене. Ці ж не два вераб’і прадаюцца за ас? I ніводзін з іх не ўпадзе на зямлю без волі Айца вашага.
У вас жа і валасы на галаве палічаны. Таму не бойцеся: вартыя вы больш за многіх вераб’ёў. Так кожнага, хто вызнае Мяне перад людзьмі, і Я прызнаю перад Айцом Маім, які ў нябёсах. А хто адрачэцца ад Мяне перад людзьмі, ад таго і Я адракуся перад Айцом Маім, які ў нябёсах.
Гэта слова Пана.
Пераклад здзейснены Секцыяй па перакладзе літургічных тэкстаў і афіцыйных дакументаў Касцёла пры ККББ
