ПЕРШАЕ ЧЫТАННЕ
Міласэрнасці хачу, а не ахвяры
Чытанне кнігі прарока Осіі.
Пазнаем жа і будзем імкнуцца пазнаць Пана.Прыйсце Яго пэўнае, як надыход світання.
Ён прыйдзе да нас, як лівень,
як веснавы дождж, які напоіць зямлю.
Што ж зрабіць мне табе, Эфраім,
што ж зрабіць мне табе, Юда?
Міласэрнасць вашая, нібы ранішні туман
і раса, што хутка знікае.
Таму Я ўдараў іх прарокамі,
таму я забіваў іх словамі вуснаў Маіх,
таму суд Мой заяснее, як світанне.
Бо міласэрнасці хачу, а не ахвяры,
пазнання Бога, а не ўсеспалення.
Гэта слова Божае.
аРЭСПАНСАРЫЙНЫ ПСАЛЬМ
Рэфрэн: Беззаганнаму ў паводзінах Я адкрыю Божае збаўленне.
1. Прамовіў Пан, Бог над багамі *
і паклікаў зямлю ад усходу да захаду сонца.
8. Не буду дакараць цябе за твае ахвяры; *
твае ўсеспаленні заўжды перада Мною.
Рэфрэн:
12. Калі б Я быў галодны, не сказаў бы табе, *
бо сусвет Мой і ўсё, што яго напаўняе.
13. Ці ем Я мяса валоў *
або ці п’ю казліную кроў?
Рэфрэн:
14. Прынось Богу ахвяру падзякі, *
і выконвай свае абяцанні Найвышэйшаму.
15. Кліч Мяне ў дзень нядолі, *
Я ўратую цябе, а ты Мяне праславіш.
Рэфрэн:
аДРУГОЕ ЧЫТАННЕ
Умацаваўся ў веры, аддаючы хвалу Богу
Чытанне Паслання святога апостала Паўла да Рымлянаў.
Браты:
Абрагам, насуперак надзеі, паверыў з надзеяй, што стане айцом многіх народаў, паводле сказанага: Такое вялікае будзе патомства Тваё. І не аслаб ў веры, хоць лічыў сваё амаль стогадовае цела ўжо змярцвелым і ўлонне Сары змярцвелым. Не сумняваўся праз нявер’е ў абяцаннях Божых, але ўмацаваўся ў веры, аддаючы хвалу Богу і будучы цалкам ўпэўненым, што Бог мае моц выканаць абяцанае. Таму гэта і залічана яму як праведнасць. Не толькі дзеля яго аднаго напісана, што залічана яму, але таксама дзеля нас, бо залічыцца і нам, якія верым у таго, хто ўваскрасіў з мёртвых Езуса, Пана нашага, які быў выданы за грахі нашыя і ўваскрэшаны дзеля апраўдання нашага.
Гэта слова Божае.
а СПЕЎ ПЕРАД ЕВАНГЕЛЛЕМ
Пан намасціў Мяне абвяшчаць Добрую Навіну ўбогім,
паслаў Мяне абвяшчаць вызваленне палонным.
Акламацыя: Аллелюя, аллелюя, аллелюя.
аЕВАНГЕЛЛЕ
Я не прыйшоў клікаць праведнікаў, але грэшнікаў
+ Чытанне святога Евангелля паводле Мацвея.
У той час:
Калі Езус праходзіў, убачыў чалавека, які сядзеў на мытні, па імені Мацвей, і сказаў яму: Ідзі за Мною. Ён устаў і пайшоў за Ім. І калі Езус сядзеў за сталом у доме, шмат мытнікаў і грэшнікаў прыйшло і села за стол з Ім і вучнямі Ягонымі. Убачыўшы гэта, фарысеі казалі вучням Яго: Чаму Настаўнік ваш есць і п’е разам з мытнікамі і грэшнікамі? Езус жа, пачуўшы гэта, сказаў ім: Не здаровым патрэбны лекар, але хворым. Пайдзіце, навучыцеся, што значыць «міласэрнасці хачу, а не ахвяры». Бо Я не прыйшоў клікаць праведнікаў, але грэшнікаў.
Гэта слова Пана.
Пераклад здзейснены Секцыяй па перакладзе літургічных тэкстаў і афіцыйных дакументаў Касцёла пры ККББ
