Пошук


21.05.2010 01:00  
Год І

ПЕРШАЕ ЧЫТАННЕ

Сір 51, 12–20

Таго, хто даў мне мудрасць, я праслаўлю

Чытанне кнігі Мудрасці Сіраха.

Буду праслаўляць Цябе, і апяваць Цябе,
і благаслаўляць імя Пана.
Яшчэ ў юнацтве, перш чым я рушыў у падарожжа,
я адкрыта шукаў мудрасці ў сваёй малітве.
Перад святыняй я прасіў аб ёй
і да канца буду шукаць яе.
Як ад кветак спеючага вінаграду,
узрадавалася маё сэрца ад яе.
Мая нага ўзышла на просты шлях,
і ад юнацтва я іду яе слядамі.
Толькі крыху схіліў сваё вуха, і ўжо атрымаў яе,
знайшоўшы для сябе шмат настаўленняў.
Дзякуючы ёй я дасягнуў поспеху,
а таго, хто даў мне мудрасць, я праслаўлю.
Бо я вырашыў паступаць паводле яе,
я рупіўся аб дабры, і асаромлены не буду.
Мая душа змагалася за яе,
і я старанна выконваў Закон.
Свае рукі я працягваў увысь
і аплакваў свае памылкі.
Я скіраваў да яе сваю душу
і ў чысціні знайшоў яе.
З ёй розум я набыў ад пачатку,
таму пакінутым не застануся.

Гэта слова Божае.

аРЭСПАНСАРЫЙНЫ ПСАЛЬМ

         Пс 19 (18), 8. 9. 10–11 (Р.: 9а)

Рэфрэн: Загады Пана справядлівыя і радуюць сэрца.

8. Закон Пана дасканалы, *
умацоўвае душу,    
сведчанне Пана вернае, *
яно дае мудрасць простым.

Рэфрэн: 

9. Загады Пана справядлівыя *
і радуюць сэрца;
наказ Пана ясны, *
прасвятляе вочы.

Рэфрэн:

10. Боязь Божая беззаганная *
і вечна трывае;
прысуды Пана праўдзівыя *
і ўсе справядлівыя.

Рэфрэн:

11. Больш каштоўныя, чым золата, *
чым мноства чыстага золата,
і саладзейшыя за мёд *
і сок сотавы.

Рэфрэн:
а

Год ІІ

ПЕРШАЕ ЧЫТАННЕ

Юд 17. 20b–25

Богу, які  можа зберагчы вас ад падзення і паставіць перад абліччам славы сваёй беззаганнымі

Чытанне Паслання святога апостала Юды.

Умілаваныя, памятайце словы, сказаныя раней апосталамі нашага Пана Езуса Хрыста. Будуйце сябе на падставе найсвяцейшай веры вашай і маліцеся ў Духу Святым. Захоўвайце сябе ў любові Божай і чакайце міласэрнасці нашага Пана Езуса Хрыста дзеля жыцця вечнага.

Да адных, што сумняваюцца, будзьце міласэрныя; другіх ратуйце, выхопліваючы з агню; да іншых будзьце міласэрнымі са страхам, ненавідзячы нават вопратку, апаганеную целам.

А таму, хто можа зберагчы вас ад падзення і паставіць перад абліччам славы сваёй беззаганнымі і радаснымі, Богу адзінаму, Збаўцы нашаму, праз Езуса Хрыста, нашага Пана – слава, веліч, панаванне і ўлада перад ўсімі вякамі, цяпер і на ўсе вякі вечныя. Амэн.

Гэта слова Божае.

аРЭСПАНСАРЫЙНЫ ПСАЛЬМ

Пс 63 (62), 2. 3–4. 5–6  (Р.: 2b)

Рэфрэн: Божа, Цябе прагне душа мая.

2. Божа, Ты мой Бог, Цябе шукаю, *
Цябе прагне душа мая,
маё цела па Табе тужыць *
у зямлі пустыннай, засохлай і бязводнай.

Рэфрэн:

3. Так, у святыні я ўглядаюся ў Цябе, *
каб убачыць Тваю сілу і славу.
4. Бо міласэрнасць Твая лепшая за жыццё, *
вусны мае будуць хваліць Цябе.  

Рэфрэн:

5. Так, буду благаслаўляць Цябе ў маім жыцці *
і ўзнясу рукі ў імя Тваё.
6. Душа мая насычаецца, нібы тлушчам і тукам, *
і вусны мае славяць Цябе радасным спевам.

Рэфрэн:

а

СПЕЎ ПЕРАД ЕВАНГЕЛЛЕМ

пар. Клс 3, 16а.17с
Акламацыя: Аллелюя, аллелюя, аллелюя.

Слова Хрыста няхай жыве ў вас ва ўсёй паўнаце,
дзякуйце Богу і Айцу праз Хрыста.

Акламацыя: Аллелюя, аллелюя, аллелюя.
аЕВАНГЕЛЛЕ
Мк 11, 27–33

Якою ўладаю Ты гэта робіш?

+ Чытанне святога Евангелля паводле Марка.

У той час:

Езус з вучнямі зноў прыйшоў у Ерузалем. І калі Ён хадзіў па святыні, падышлі да Яго першасвятары, кніжнікі і старэйшыны і пыталіся ў Яго: Якою ўладаю Ты гэта робіш? І хто даў Табе гэтую ўладу, каб рабіць гэта?
Езус адказаў ім: Запытаюся ў вас пра адно. Адкажаце Мне, тады і Я вам скажу, якою ўладаю раблю гэта. Хрост Яна быў з неба ці ад людзей? Адкажыце Мне.

Яны разважалі паміж сабою: Калі скажам «з неба», то Ён скажа: Чаму ж вы не паверылі яму? А калі скажам «ад людзей»? Яны баяліся народу, бо ўсе лічылі Яна сапраўдным прарокам, таму сказалі ў адказ Езусу: Не ведаем.

Тады Езус сказаў ім: I Я не скажу вам, якою ўладаю раблю гэта.

Гэта слова Пана.



Пераклад здзейснены Секцыяй па перакладзе літургічных тэкстаў і афіцыйных дакументаў Касцёла пры ККББ

Абноўлена 22.06.2017 22:48
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Дух хоча жыць у нас –
мы пакліканы да вечнага жыцця