Пошук


20.05.2010 01:00  
Год І

ПЕРШАЕ ЧЫТАННЕ

Сір 4, 11–19

Хто любіць мудрасць, таго любіць Бог

Чытанне кнігі Мудрасці Сіраха.

Мудрасць узвышае сваіх дзяцей
і падтрымлівае тых, хто яе шукае.
Хто яе любіць, той любіць жыццё,
а тыя, хто яе шукае ад світання, напоўняцца радасцю.
Хто ёй валодае, атрымае ў спадчыну славу,
і куды б ні пайшоў, благаславіць яго Пан.
Тыя, хто служыць ёй, будуць служыць Святому,
а тых, хто ўпадабаў яе, палюбіць Пан.
Хто паслухмяны ёй, той будзе судзіць народы,
а хто зважае на яе, той будзе жыць у бяспецы.
Хто ёй даверыцца, атрымае ў спадчыну яе,
і валодаць ёю будуць ягоныя нашчадкі.
Спачатку яна пойдзе з ім пакручастымі шляхамі,
будзе наводзіць на яго боязь і страх
і мучыць яго сваім выхаваннем,
пакуль не ўпэўніцца ў ягонай душы
і не выпрабуе яго сваімі наказамі.
Але потым зноў вернецца да яго па простым шляху, і ўзрадуе яго,
і адкрые яму свае таямніцы.
Калі ж ён заблукае, пакіне яго
і аддасць яго ў рукі ягонага падзення.

Гэта слова Божае.

аРЭСПАНСАРЫЙНЫ ПСАЛЬМ

           Пс 119 (118), 165 і 168. 171–172. 174–175  (Р.: 165а)

Рэфрэн: Вялікі спакой у тых, хто любіць Твой закон.

165. Вялікі спакой у тых, хто любіць Твой закон, *
яны ніколі не спатыкнуцца.
168. Я захоўваю наказы Твае і сведчанні, *
бо ўсе мае шляхі перад Табою.

Рэфрэн:

171. Вусны мае абвяшчаюць хвалу, *
бо Ты вучыш мяне сваім пастановам.
172. Няхай язык мой спявае Тваё слова, *
бо ўсе запаведзі Твае справядлівыя.

Рэфрэн:

174. Я прагну, Пане, Твайго збаўлення, *
і закон Твой — мая ўцеха.
175. Няхай жыве мая душа і Цябе хваліць, *
і няхай мне дапамогуць Твае прысуды.

Рэфрэн:
а

Год ІІ

ПЕРШАЕ ЧЫТАННЕ

Як 4, 13–17

Не ведаеце, якім будзе заўтра жыццё вашае

Чытанне Паслання святога апостала Якуба.

Умілаваныя:

Звяртаюся да вас, якія кажаце: Сёння ці заўтра адправімся ў пэўны горад і правядзём там год, будзем гандляваць і зарабляць. Між тым вы не ведаеце, якім будзе заўтра жыццё вашае. Бо вы пара, якая з’яўляецца на імгненне, а потым знікае. Замест таго, вы павінны былі б сказаць: Калі Пан захоча, мы будзем жыць і зробім тое ці іншае. Вы ж цяпер хваліцеся ў ганарлівасці вашай. Усялякае такое выхвалянне дрэннае. Таму кожны, хто ведае, як рабіць дабро, і не робіць, той чыніць грэх.

Гэта слова Божае.

аРЭСПАНСАРЫЙНЫ ПСАЛЬМ

            Пс 49 (48), 2–3. 6–7. 8–10. 11  (Р.: Мц 5, 3)

Рэфрэн: Шчаслівыя ўбогія духам, бо іх Валадарства Нябеснае.

2. Пачуйце гэта, усе народы, *
слухайце, усе жыхары свету,
3. і людзі простыя, і знатныя, *
і бедныя разам з багатымі.

Рэфрэн:

6. Чаго мне баяцца ў дні няшчасця, *
калі вакол мяне злосць маіх ворагаў,
7. якія спадзяюцца на свой дастатак *
і хваляцца сваім вялікім багаццем?

Рэфрэн:

8. Але ніводзін чалавек не можа выкупіць свайго брата *
і даць Богу выкуп за яго.
9. Дарагі выкуп за іхнія душы †
і ніколі гэтага не будзе, *
10. каб ён мог жыць вечна і не ўбачыў магілы.

Рэфрэн:

11. Таму што бачна: мудрыя паміраюць так жа, *
як гіне просты і неразумны,
іншым пакідаючы *
сваё багацце.

Рэфрэн:

а

СПЕЎ ПЕРАД ЕВАНГЕЛЛЕМ


Акламацыя: Аллелюя, аллелюя, аллелюя.
Ян 14, 6
Я — дарога, і праўда, і жыццё, — кажа Пан, —
ніхто не прыходзіць да Айца інакш,
як толькі праз Мяне.

Акламацыя: Аллелюя, аллелюя, аллелюя.
аЕВАНГЕЛЛЕ
Мк 9, 38–40

Хто не супраць нас, той з намі

+ Чытанне святога Евангелля паводле Марка.

У той час:

Ян сказаў Езусу: Настаўнік, мы бачылі чалавека, які ў імя Тваё выганяў злых духаў, і забаранялі яму, бо не хадзіў з намі.

Езус жа сказаў: Не забараняйце яму, бо ніхто, хто ўчыніў цуд у Маё імя, не зможа адразу пачаць зласловіць Мяне. Бо хто не супраць нас, той з намі.

Гэта слова Пана.


Пераклад здзейснены Секцыяй па перакладзе літургічных тэкстаў і афіцыйных дакументаў Касцёла пры ККББ

Абноўлена 22.06.2017 22:48
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Бог заўсёды чакае нас.
Ён ніколі не губляе надзеі і заўсёды прабывае побач.