ПЕРШАЕ ЧЫТАННЕ
Перад стварэннем зямлі Мудрасць была ўстаноўлена
Чытанне кнігі Прыпавесцяў Саламона.
Так кажа Мудрасць Божая:Пан стварыў мяне на пачатку шляху свайго,
перад дзеямі сваімі, спрадвеку.
Адвеку я была ўстаноўлена,
ад пачатку, перад стварэннем зямлі.
Я нарадзілася, калі не было яшчэ ні бездані,
ні крыніц, поўных вады.
Перш, чым былі пастаўлены горы,
раней за пагоркі я нарадзілася,
калі яшчэ не стварыў Ён ні зямлі, ні палёў,
ні першых пылінак сусвету.
Калі ўмацоўваў нябёсы, я была там.
Калі крэсліў скляпенне над паверхняю бездані,
калі ўсталёўваў уверсе аблокі,
калі мацаваў крыніцы бездані,
калі вызначаў межы мору,
каб воды не выходзілі па-за берагі яго,
калі закладваў асновы зямлі,
тады была пры Ім, як майстар,
была штодня Яго ўпадабаннем,
весялілася перад Яго абліччам увесь час,
весялілася на зямным коле Яго,
і радасць мая была з чалавечымі сынамі.
Гэта слова Божае.
аРЭСПАНСАРЫЙНЫ ПСАЛЬМ
Рэфрэн: Пане, Божа наш, якое велічнае імя Тваё!
4. Калі я бачу Твае нябёсы, справу пальцаў Тваіх, *
месяц і зоркі, якія Ты ўмацаваў:
5. то чым ёсць чалавек, што Ты пра яго памятаеш, *
і сын чалавечы, што Ты ўзгадваеш пра яго?
Рэфрэн:
6. Ты ўчыніў яго мала меншым ад анёлаў, *
славаю і веліччу ўвянчаў яго.
7. Паставіў яго валадаром над справай рук Тваіх, *
усё паклаў яму пад ногі.
Рэфрэн:
8. Авечак і жывёлу ўсялякую *
і звяроў дзікіх,
9. птушак нябесных і рыбу марскую, *
і ўсё, што ходзіць сцежкамі марскімі.
Рэфрэн:
аДРУГОЕ ЧЫТАННЕ
Любоў Божая вылілася ў сэрцы нашыя праз Духа
Чытанне Паслання святога апостала Паўла да Рымлянаў.
Браты:
Апраўданыя паводле веры, мы маем мір з Богам праз Пана нашага Езуса Хрыста, праз якога, дзякуючы веры, мы атрымалі доступ да той ласкі, у якой трываем і ганарымся надзеяй на славу Божую.
І не толькі гэтым, але ганарымся і ўціскам, ведаючы, што ўціск нараджае вытрываласць, вытрываласць жа — выпрабаваную цноту, выпрабаваная цнота ж — надзею, а надзея не ганьбіць, бо любоў Божая вылілася ў сэрцы нашыя праз Духа Святога, які дадзены нам.
Гэта слова Божае.
а СПЕЎ ПЕРАД ЕВАНГЕЛЛЕМ
Богу, які ёсць, які быў і які прыходзіць.
Акламацыя: Аллелюя, аллелюя, аллелюя.
аЕВАНГЕЛЛЕ
Усе, што мае Айцец, гэта маё; Дух з Майго возьме і абвесціць вам
+ Чытанне святога Евангелля паводле Яна.
У той час:
Езус сказаў сваім вучням: Яшчэ шмат чаго маю сказаць вам, але цяпер вам гэтага не знесці. Калі ж прыйдзе Ён, Дух праўды, навучыць вас усёй праўдзе. Бо не ад сябе будзе прамаўляць, а будзе казаць вам усё, што пачуў, і будучыню абвесціць вам. Ён уславіць Мяне, бо ад Майго возьме і абвесціць вам.
Усе, што мае Айцец, гэта маё. Таму Я сказаў вам, што з Майго возьме і абвесціць вам.
Гэта слова Пана.
Пераклад здзейснены Секцыяй па перакладзе літургічных тэкстаў і афіцыйных дакументаў Касцёла пры ККББ
