Каментарый да літургіі
«Ці ў людзей я цяпер шукаю ўпадабання, ці ў Бога?»
Такімі словамі звяртаецца св. Павел да Галатаў, але таксама і да нас. Сярод спакусаў сучаснага свету вельмі важна заставацца верным Богу і Яго Слову, якое сталася Целам і пасялілася паміж намі, якое надалей жыве і нясе збаўленне ўсяму свету. У штодзённым жыцці бывае цяжка паводзіць сябе як сапраўдны хрысціянін – дапамагчы бедаку пры дарозе, не прамаўчаць, калі ідзе гаворка пра «карысць» абортаў, не праходзіць міма там, дзе дзеецца несправядлівасць, і г.д. Не шукайма ж упадабання асяроддзя, якое змяняецца, але толькі Бога, які ёсць крыніцай вечнага шчасця.
Каментарый да літургіі слова
«…нават у Ізраэлі Я не знайшоў такой вялікай веры».
Сапраўды, сотнік з Евангелля меў чыстае і вялікае сэрца. Толькі такое сэрца можа клапаціцца пра патрэбы і боль іншых. Той чалавек, за якога ён прасіў Езуса, быў яму не бацька, не брат, не сябра, а толькі слуга, які паслухмяна выконваў яго заданні. Апрача прыкладу вялікай веры ў моц Божую, Евангелле прапануе нам маліцца да Пана за ўсіх тых, хто гэтага патрабуе, хто знаходзіцца вакол нас, не толькі дома, але і на працы, у касцёле, на вуліцы, і, канешне, за тых, хто просіць аб малітве. Маліцца, не чакаючы за гэта падзякі. Лепшай узнагародай няхай стануцца словы Пана: «…нават у Ізраэлі Я не знайшоў такой вялікай веры».
Малітва вернікаў
Божа міласэрны і цярплівы, пакорна просім Цябе:
- Умацуй у веры і любові Касцёл свой і падтрымай тых, хто ім кіруе.
- Дапамажы ўсім тым, хто працуе на місіях, дадай ім мужнасці і цярпення ў прапаведванні Хрыста.
- Благаславі дзяцей, якія прынялі Першую Камунію, каб надалей узрасталі і паглыбляліся ў веры.
- Дай хворым падтрымку і суцяшэнне, каб адчулі Тваю прысутнасць і апеку.
- Падтрымай нас, сабраных ля Твайго алтара, каб у штодзённае жыццё неслі Тваё святло.
Пане, прымі нашыя малітвы, якія ўзносім да Цябе, праз Хрыста, Пана нашага. Амэн.
Рэгіна Гасанна Атрашкевіч ОРs
