Пошук


14.02.2013 00:00  

Каментарый да літургіі

Наша зямное жыццё — гэта нястомная барацьба. Барацьба з самім сабой, са сваімі схільнасцямі да дрэннага, барацьба са спакусамі, якіх так шмат наўкола. Але гэта ўсё мае сэнс толькі тады, калі мы імкнёмся дасягнуць вечнага прабывання ў Нябесным Валадарстве.

Перажываем сёння першую нядзелю Вялікага посту. Многія з нас пастанаўляюць за гэты час духоўна ўзмацніцца, перамяніць свае адносіны да іншага чалавека, пазбавіцца дрэнных звычак. Але, каб быць моцнымі ў сваіх добрых памкненнях і ў змаганнях са спакусамі, мы патрабуем духоўнага пажыўлення — асабістай сустрэчы з Хрыстом у Эўхарыстыі і штодзённай малітве.

У  час Вялікага посту мы запрошаны сузіраць таямніцу Крыжа, каб здзейсніць сапраўднае навяртанне асабістага жыцця.


Каментарый да літургіі слова

Вялікі пост для Касцёла з’яўляецца вельмі важным і каштоўным часам. Літургія слова першай нядзелі паказвае наша чалавечае змаганне на зямлі. У Евангеллі мы пачуем, як Езус перамагае спакусы злога духа словам Божым. Ён не ўступае ў дыялог і не прагне даказаць сваю боскасць. Менавіта тут мы бачым, якую вялікую моц мае Божае слова. Святы Павел кажа, што наша вера павінна праяўляцца ў словах, бо сэрцам вераць для апраўдання, а вуснамі вызнаюць дзеля збаўлення. Таксама пачуем, што паміж веруючымі ў Хрыста няма ніякай розніцы, бо Ён шчодры для ўсіх, хто Яго кліча. Што і пацвярджае псальміст: «За тое, што ён палюбіў Мяне, уратую яго (…) Я буду з ім ва ўціску, вызвалю яго і праслаўлю».


Малітва вернікаў

Да Бога, якi запрасiў нас на сённяшнюю Эўхарыстыю, з верай занясём нашыя просьбы:

  • Молімся за Айца Святога, каб Бог адарыў яго шматлікімі ласкамі за адданае служэнне Касцёлу.
  • Молімся за святароў, каб Вялікі пост быў для іх часам асабістага аднаўлення і ўмацавання ў веры.
  • Молімся за хрысціян, якія церпяць пераслед, каб нават у самыя цяжкія моманты яны змаглі адчуць прысутнасць Хрыста і Яго любоў.
  • Молімся за людзей, якія знаходзяцца ў грахоўнай залежнасці, каб у час Вялікага посту яны перамянілі сваё жыццё і паядналіся з Хрыстом.
  • Молімся за памерлых, якія пры зямным жыцці спадзяваліся на Божую Міласэрнасць, каб як мага хутчэй маглі ўвайсці ў Нябеснае Валадарства.
  • Молімся за нас, прысутных на Эўхарыстыі, каб мы не змарнавалі час Вялікага посту і былі моцныя ў сваіх пастановах.

Пане Божа, аддаем Табе нашыя просьбы. Выслухай нашыя малiтвы i адары свой Касцёл патрэбнымi ласкамi. Праз Хрыста, Пана нашага. Амэн.

    Падрыхтавала с. Марына Брылёнак

    Абноўлена 25.09.2017 11:23
    Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

    Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

    . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
    Папа Францішак

    Дух хоча жыць у нас –
    мы пакліканы да вечнага жыцця