Каментарый да літургіі
Кожная нядзельная Эўхарыстыя — гэта наша асабістая сустрэча з Хрыстом. Падчас яе Ён напаўняе нас сваёй любоўю, ласкай і дае надзею.
Толькі мы павінны па прыкладу Марыі даверыць свае клопаты і цяжкасці Езусу і, як у Кане Галілейскай, адбудзецца цуд у нашым жыцці. Але, каб гэта сталася, трэба спачатку запрасіць Яго ў сваё штодзённае жыццё, у якім часта шмат розных спраў, і па-сапраўднаму спаткаць Хрыста і адчуць Яго любоў да нас.
Каментарый да літургіі слова
«Розныя ёсць дары, але той самы Дух».
Літургія слова вельмі выразна паказвае нам, што Бог дзейнічае ў чалавеку незалежна ад яго ўзроўню мудрасці ці прафесіі. Кожны атрымаў дары Духа Святога, якія павінен развіваць у сваім жыцці дзеля Божай хвалы і для карысці іншага чалавека.
У сваю чаргу Евангелле паказвае нам Маці Божую, як нашу апякунку, якая заўважае нашыя праблемы і заступаецца за нас перад Хрыстом, які заўсёды мае адкрытае сэрца для кожнага чалавека. Езус па просьбе Марыі чыніць цуд на вяселлі ў Кане, і вельмі важнымі тут з’яўляюцца словы Марыі: «тое, што Ён скажа вам, зрабіце».
Калі мы прагнем перамены свайго жыцця на лепшае, калі прагнем жыць у любові і еднасці, то павінны захоўваць Божае слова і жыць згодна з навучаннем Хрыста.
Малітва вернікаў
- Молімся за Святога Айца, каб яго апостальская дзейнасць садзейнічала ўсталяванню супакою ў свеце.
- Молімся за тых, хто не верыць у Хрыста, каб праз заступніцтва Марыі перамянілі сваё жыццё і жылі ў еднасці з Богам.
- Молімся за сужэнствы, каб яны заўсёды захоўвалі вернасць, пашану і любоў адно да аднаго.
- Молімся за таленавітых людзей, каб сваімі дарамі служылі Богу і іншаму чалавеку.
- Молімся за памерлых, каб маглі сузіраць Божае Аблічча ў Нябесным Валадарстве.
- Молімся за нас, прысутных на Эўхарыстыі, каб пад апекай Марыі мы ўмацоўвалі сваю веру і любоў да Хрыста.
Падрыхтавала с. Марына Брылёнак
