Каментарый да літургіі
Меркаванне аб тым, што рэлігія з’яўляецца асабістай справай, — небяспечнае і фальшывае. Такой пазіцыі трымаюцца тыя, хто хоча знішчыць яе. Калі ж такое паўтараюць хрысціяне, можна сказаць, што яны не ведаюць, што чыняць.
Вера пашырае сэрца чалавека і адкрывае яго для бліжніх. Вера вучыць нас, што ў іншым чалавеку трэба заўважыць Хрыста, які кажа: «Я быў галодны, а вы далі Мне есці… Хворы, а вы Мяне адведалі, смутны, а вы суцешылі Мяне. Усё, што вы зрабілі найменшаму сярод вас, гэта Мне зрабілі».
Няхай міласэрны Бог знішчыць нашыя грахі і адкрые сэрца на бліжніх, асабліва на тых, з якімі мы сустракаемся штодзённа.
Каментарый да літургіі слова
Праз сённяшняе Евангелле прамаўляе да нас папярэднік Езуса — Ян Хрысціцель. Ён абыходзіў усю краіну, удзяляў хрост і заклікаў да навяртання. Найважнейшая навука Яна заключаецца ў словах «падрыхтуйце дарогу Пану!».
Дарога, пра якую ідзе гаворка, — гэта дарога нашага жыцця. Яе трэба падрыхтаваць у сэрцы, а для гэтага патрэбна навяртанне. Чалавек зрабіў складаным свае дарогі жыцця праз грэх і згубіўся ў жыцці. Рабіць простымі сцежкі для Пана азначае перамяніць сваё жыццё, інакш кажучы, навярнуцца. Рабіць простымі сцежкі — гэта значыць разарваць з грахом. Стаць у праўдзе нам дапамагае слова Божае, дапамагае паглядзець на нашае жыццё, на нашыя паводзіны. Менавіта сёння Езус хоча, каб мы скіравалі позірк на нашыя сцежкі жыцця, скрыўленыя хлуснёю і зарослыя грахом.
Ці маю ў сэрцы шчырае прагненне навяртання, перамены свайго жыцця? Ці шукаю ў сваёй штодзённасці хвіліны на малітву — шчырую размову з Богам аб маім жыцці, аб усім тым, з чаго яно складаецца? Ці шукаю цішыні і засяроджанасці? Сам Бог хоча прыходзіць да нас з дапамогай. Ён сам хоча ачышчаць і выпростваць нашыя сцежкі, бо ведае, што самі мы нічога не можам. Гэта Ён сам прыходзіць і шукае магчымасці, каб перамяніць нашыя сэрцы, прыцягнуць іх да Сябе. Бог прагне нашага навяртання, і Ён жа з’яўляецца асновай гэтага навяртання. Нам трэба толькі даверыцца Яму, адкрыцца на ласку, прыняць усё тое, што ў сваёй міласэрнасці Бог дае кожны дзень: прыняць Яго любоў, якая мае моц перамяніць і стварыць нанава нашае сэрца, заблытанае ў грэх.
Малітва вернікаў
Богу, які ёсць не толькі нашым Панам, але і Айцом, прадставім просьбы, якія знаходзяцца ў нашых сэрцах:
- Молімся за святы Касцёл, каб быў для ўсяго свету выразным знакам Добрай Навіны аб збаўленні. Цябе просім….
- Молімся за Святога Айца і нашага біскупа, каб узмацнялі нас у веры і даверы Богу.
- Молімся за нашую парафію і ўсіх яе жыхароў, каб з чыстым сэрцам чакалі надыходзячых святаў Божага Нараджэння.
- Молімся за людзей пажылых, самотных і хворых, каб гэтыя святы прынеслі ім бадзёрасць і сілу для жыцця.
- Молімся за нашых памерлых, каб Збаўца дазволіў ім аглядаць сваё аблічча.
- Молімся за нас саміх, каб мы сталі годным домам Езуса Хрыста.
Усемагутны Вечны Божа, выслухай просьбы, якія Твой народ узносіць да Цябе, і споўні іх згодна з Тваёю воляй. Просім Цябе аб гэтым праз Хрыста, Пана нашага. Амэн.
С. Мірыям Маршалэк ZSJM
