Збіраемся ў святыні на нядзельнай Эўхарыстыі, каб адказаць на запрашэнне Хрыста, каб сустрэцца з Ім у слове і ў св. Камуніі. Прагнем даверыць Езусу ўсе свае справы, усе клопаты штодзённага жыцця, а асабліва даверыць кожны дзень надыходзячага тыдня.
Прыходзім, бо прагнем нанова адкрыць моц Божай любові.
Каментарый да літургіі слова
Любоў мае вельмі вялікую вартасць у жыцці чалавека. Яна з’яўляецца вялікім дарам Бога. Менавіта сёння літургію слова пранізвае тэма любові. «Буду любіць Цябе, Пане, моц мая!» — гэтымі словамі ўсклікае псальміст. Але як чалавек можа выразіць сваю любоў да Усемагутнага Бога, свайго Стварыцеля? Адказ пачуем у першым чытанні: «Любі Пана Бога Твайго ўсім сэрцам тваім…». А ў Евангеллі Езус скажа, што гэта найважнейшая запаведзь, і дадасць: «Любі бліжняга, як самога сябе».
Мэтай нашага зямнога жыцця з’яўляецца сустрэча з Хрыстом у Нябесным Валадарстве. Дасягнуць яе мы зможам, калі нашае сэрца будзе напоўнена любоўю. Шчырай любоўю да Бога і да іншага чалавека.
Бо любоў большая, чым смерць,
Большая, чым крыж,
Большая, чым грэх!
Малітва вернікаў
- Молімся за Святога Айца Бэнэдыкта XVI, каб яго вучэнне аб Божай любові ўмацоўвала веру ў Касцёле.
- Молімся за святароў, каб у сакрамэнце споведзі паказвалі вернікам моц Божай міласэрнасці.
- Молімся за дзяцей, якія знаходзяцца ў прытулках і дзіцячых дамах, каб знайшліся людзі, якія адчыняць для іх свае сэрцы і атуляць клопатам і любоўю.
- Молімся за кіраўнікоў дзяржаў, каб у сваіх рашэннях кіраваліся супольным дабром і шанавалі годнасць кожнага чалавека.
- Молімся за памерлых, асабліва за душы, якія знаходзяцца ў чыстцы, каб нашыя малітвы і ахвяры адчынілі ім брамы Божага Валадарства.
- Молімся за нашу эўхарыстычную супольнасць, каб сэрца кожнага з нас заўсёды было адчынена на іншага чалавека.
Падрыхтавала с. Марына Брылёнак
