Сёння падчас Імшы будзем маліцца аб дарах смеласці і вытрываласці ў
веры. Каб мы ніколі не хаваліся ад міласэрнага Бога, нават калі зграшылі, а шчыра вызнавалі свае правіны і імкнуліся з’яднацца з Ім.
«Калі Ты, Пане, будзеш зважаць на беззаконні, хто ж вытрывае, Пане?»
Каментарый да літургіі слова
«Калі валадарства раздзеліцца само ў сабе, не можа выстаяць такое валадарства. І калі дом раздзеліцца сам у сабе, не можа выстаяць такі дом».
Езус сёння вучыць нас еднасці. У штодзённым жыцці так ёсць, што нават розныя дробныя рэчы могуць псаваць настрой, выклікаць незадаволенасць. Асабліва гэта характэрна ў сем’ях. І калі прыняць сям’ю за маленькае Валадарства, але раздзеленае спрэчкамі, непаразуменнямі, то яно не можа выстаяць у жыцці.
Папросім сёння Бога, каб дапамог нам быць заўсёды адзіным Валадарствам
Божым, нягледзячы на ўсе цяжкасці, якія сустракаем на сваім шляху.
Малітва вернікаў
Як маці і браты, чакаючыя звонку, пакорна просім нашага Бога:
- Езу, прыйдзі ў нашае жыццё і ўчыні, каб мы заўсёды бачылі ў кожным чалавеку Твой вобраз
- Езу, дапамажы ў нашым нявер’і
- Молімся за студэнтаў, якія здаюць экзамены, каб добры Бог суправаджаў іх заўсёды і даваў упэўненасць і супакой
- Молімся за людзей самотных, каб зразумелі, што Хрыстус ёсць побач у кожную хвіліну жыцця
- Молімся за дзяцей, якія маюць канікулы, каб і ў гэты час памяталі пра патрэбу з’яднання з Богам у малітве
- Божа, Ты сказаў: «Хто будзе выконваць волю Божую, той Мне брат і сястра, і маці». Дык дапамажы нам заўсёды выконваць Тваю волю, нават калі гэта цяжка.
Рэгіна Атрашкевіч
