Каментарый да літургіі
«Няхай мне станецца паводле Твайго слова».
Каментарый да літургіі слова
Сёння ў літургіі слова мы бачым паставы дзвюх жанчын: Еву, якая не паслухала Бога, і Марыю, якая стала прыкладам паслухмянасці для ўсяго свету. Перад намі заўсёды стаіць выбар, слухаць словы Бога, давяраць Яму, ці хацець стаць «як Бог».
Сённяшняя ўрачыстасць паказвае нам прыклад чалавека, які ўсю сваю надзею, усё сваё жыццё аддаў у рукі Божага Провіду. Адказ Марыі — «няхай мне станецца паводле Твайго слова» — павінен стаць для хрысціяніна дэвізам яго жыцця. Будзем прасіць Беззаганную Маці, каб вучыла нас пакоры і бязмежнаму даверу Богу.Малітва вернікаў
Праз заступніцтва Маці Хрыста, якую Бог адарыў асаблівай прывілеяй і захаваў ад усялякай заганы першароднага граху, молімся аб патрэбных ласках для ўсяго свету:
- Молімся за Каталіцкі Касцёл, каб захаваў сваю беззаганнасць Хрыстовай Абранніцы. Цябе просім…
- Молімся за Святога Айца і ўсё духавенства, каб прыкладам свайго ахвярнага служэння садзейнічалі пашырэнню Божага Валадарства на зямлі. Цябе просім…
- Молімся за нашу Радзіму, няхай Марыя ахоўвае нашыя душы ад бязвер’я. Цябе просім…
- Молімся за святароў, каб паказвалі людзям прыклад сапраўднай жывой веры. Цябе просім…
- Молімся за людзей, якія шукаюць сэнс жыцця, каб Марыя паказала ім Хрыста, які ёсць Дарога, Праўда і Жыццё . Цябе просім…
- Молімся за душы канаючых, каб Маці Божага Сына сустрэла іх у вечнасці. Цябе просім…
- Молімся за нас, тут прысутных, каб мы праз навяртанне сэрца і пакаянне імкнуліся да паяднання з Хрыстом. Цябе просім…
Пане Божа, прымі і выслухай нашыя малітвы, якія мы ўзносім да Цябе праз заступніцтва Беззаганнай Маці, Праз Хрыста, Пана нашага. Амэн.
