Каментарый да літургіі і малітва вернікаў на ХVII Звычайную нядзелю, Год С (24 ліпеня)

Каментарый да літургіі

Эўхарыстыя — гэта асаблівы момант сустрэчы нашай душы з Умілаваным. Ён кажа нашаму сэрцу патрэбныя словы. Але ад нас залежыць, ці будзем мы іх слухацца. Няхай жа Дух Святы ўмацоўвае нашае сэрца і робіць яго чулым на голас Хрыста, няхай корміць нас Яго Целам. А мы будзем старацца быць вернымі Яго заклікам.

Каментарый да літургіі слова

Сёння літургія слова нагадвае нам пра вышэйшыя каштоўнасці і перасцерагае, каб не аддалі свайго сэрца зямным дабротам. «Марнасць марнасцяў» тут, на зямлі, калі мы бачым сэнс толькі ў зямных дабротах. Таксама чалавек з прыпавесці Езуса кажа нам аб тым самым, што ніколі мы не павінны прывязвацца да зямных рэчаў.

«Калі ж вы ўваскрэслі з Хрыстом, шукайце таго, што ў вышынях, дзе Хрыстус сядзіць праваруч Бога». Трэба глядзець у Неба! На зямлі ўсё праміне, а нашая Айчына знаходзіцца ў Небе. Скіруем жа наш позірк на Неба і будзем старацца багацець перад Богам.

Малітва вернікаў  

У надзеі даверым Усемагутнаму Богу нашыя малітвы і просьбы:

1. Молімся за Святы Касцёл, каб у Год Міласэрнасці ён з радасцю прымаў кожную заблукалую душу і паказваў свету Міласэрнае Сэрца Бога.
2. Молімся за Святога Айца Францішка і ўсіх біскупаў, каб прапаведвалі і сведчылі аб міласэрнасці і вялікай любові Бога да чалавека.
3. Молімся за тых, хто жыве ў граху, каб не баяліся наблізіцца да Бога і паверылі, што Ён чакае навяртання кожнага чалавека.
4. Молімся аб духоўным плёне для кожнага ўдзельніка Сусветных дзён моладзі ў Кракаве, каб былі сапраўднымі сведкамі Хрыста.
5. Молімся за нашых дабрадзеяў, каб сам Бог быў для іх узнагародай.
6. Молімся за нас, тут прысутных, каб удзел у сённяшняй літургіі навучыў распаўсюджваць Божую міласэрнасць сярод усіх людзей.

Просім Цябе, Божа, выслухай нашыя просьбы, якія ў пакоры Табе прадстаўляем. Праз Хрыста, Пана нашага.

С. Таццяна Гмыза SJE