Каментарый да літургіі і малітва вернікаў на нядзелю ў актаве Нараджэння Пана. Свята Святой Сям'і: Езуса, Марыі і Юзафа (28 снежня)

Каментарый да літургіі

Нядзеля, якую перажываем у актаве Нараджэння Пана - гэта свята Святой Сям'і: Езуса, Марыі і Юзафа. Любоў да Бога заўсёды прысутнічае ў адносінах паміж людзьмі, а вопыт першых адносінаў любові маем у сям’і. І таму сям’я для кожнага чалавека вельмі важная і каштоўная. Прыкладам для нас з’яўляецца Сям'я з Назарэту, дзе ўзрастаў Езус, адчуваючы апеку і любоў Маці і адказнасць святога Юзафа.

Сёння падчас Эўхарыстыі асаблівым чынам просім за нашыя сем’і, каб адважна выконвалі заданні, якія атрымалі ад Бога ў ласцы паклікання.

Каментарый да літургіі слова

Аўтар кнігі Мудрасці Сіраха заклікае сёння да шанавання сваіх бацькоў і паслухмянасці ім, звяртаючы ўвагу на карысць, якая вынікае з такіх паводзін. Евангелле гаворыць аб Святой Сям'і з Назарэту, якая ахвяруе Богу свайго Сына. Апостал Павел у сваім Пасланні да Каласянаў вучыць прынцыпам хрысціянскага жыцця ў доме. Хай нашымі сэрцамі кіруе Божы супакой. Давайце прыслухаемся да слова Хрыста.

Малітва вернікаў

Да Бога, які даў нам за прыклад Святую Сям'ю з Назарэту, занясём нашыя просьбы:

1. Ойча, Ты хацеў, каб Сын Твой вырас у сапраўднай сям'і, аберагай Касцёл Святы ад спакусаў ворага. Цябе просім...
2. Ойча, Ты даў Святой Сям’і Юзафа ў якасці апекуна, абарані Айца Святога Францішка, які з'яўляецца абаронцам годнасці кожнай сям'і. Цябе просім...
3. Ойча, Ты ўжо ў Старым Запавеце гаворыш аб пашане да бацькоў, май у апецы беларускія сем'і, каб выхоўвалі дзяцей з пачуццём любові да бліжняга. Цябе просім...
4. Ойча, Ты клічаш людзей у сваё Валадарства, дай памерлым радасць жыцця вечнага. Цябе просім...
5. Ойча, Ты бачыш нашую слабасць, прыйдзі і вазьмі ў апеку нашую душу і цела. Цябе просім...

Божа, Ты з любоўю прыняў ахвяру Марыі і Юзафа. Прымі і нашыя малітвы. Праз Хрыста, Пана нашага.

С. Людміла Леўдаровіч MChR