Пошук


02.12.2017 13:00  

Каментарый да літургіі

Сёння мы распачынаем перыяд Адвэнту, які з’яўляецца часам чакання і падрыхтоўкі да прыйсця Хрыста. Праз некалькі тыдняў мы будзем урачыста адзначаць памяць Яго першага прыйсця на зямлю, а нашы сэрцы і думкі будуць напоўнены чаканнем Яго паўторнага прыйсця ў хвале.

Сённяшняя літургія скіроўвае нашу ўвагу на гэтае прыйсце. Мы чуваем на малітве і з даверам чакаем. Каб нашы малітвы ішлі з чыстага сэрца, перапросім найлепшага Айца за недахоп трываласці і веры ў чаканні прыйсця Яго Сына.

Каментарый да літургіі слова

Сённяшнія чытанні перапоўнены духам чакання прыйсця Хрыста, які заклікае нас да пастаяннай чуйнасці. Пан прыйдзе, а мы павінны быць гатовыя да спаткання з Ім. Адсюль нараджаецца патрэба адпаведнай падрыхтоўкі, але ў гэтай падрыхтоўцы мы не аддадзены толькі на ўласныя сілы, як кажа св. Павел.

Хрыстус будзе нас умацоўваць да часу свайго прыйсця. Услухаемся ў Божае слова, каб яно ўзмацніла нашу веру і надзею на прыйсце Хрыста.

Малітва вернікаў


Да Хрыста, які павінен прыйсці, пакорна ўзнясём просьбы, каб удзяліў патрэбныя нам ласкі ў чаканні Яго прыйсця:

1. Езу, умацуй духоўна і адары здароўем нашага Папу Францішка, каб яго служэнне было сведчаннем сапраўднай Божай любові.
2. Езу, благаславі і напоўні сваімі дарамі біскупаў і святароў, каб мелі моц несці супакой і прабачэнне туды, дзе пануе грэх.
3. Езу, аднаві ўзаемную любоў і пашану ў сужэнствах, якія перажываюць цяжкасці.
4. Езу, навучы нас шанаваць кожнае зачатае жыццё. Няхай кожнае дзіця будзе каханым і чаканым у сваёй сям’і.
5. Езу, Валадар жыцця, прымі нашых блізкіх памерлых у сваё Валадарства.
6. Езу, дапамажы нам вытрываць у нашых адвэнтавых пастановах, каб мы маглі з адкрытым сэрцам прыняць Цябе ў сваё жыццё.

Божа, наш найлепшы Айцец, просім, пачуй нашыя малітвы, якія скіроўваем да Цябе, і ўмацуй нашу веру ў штодзённым жыцці. Амэн.
 

Кс. Юрый Марціновіч

Абноўлена 02.12.2017 13:22
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Спагадлівасць - гэта праява Божай
Міласэрнасці, адзін з сямі дароў Святога Духа