Каментарый да літургіі
«…Пан — мой пастыр, ні ў чым не буду мець нястачы,
Ён дазваляе спачываць мне на зялёных пашах.
Да водаў спакойных вядзе мяне,
Ён душу маю пажыўляе...»
Літургія гэтай нядзелі прыводзіць нас да вельмі прыгожай і важнай думкі – Бог пра нас клапоціцца. Прычым не толькі ў нашыя радасныя хвіліны жыцця, але і ў час смутку. Папросту мы яшчэ не навучыліся ў поўнай меры разумець Божыя планы ў нашым жыцці і за гэта Яму дзякаваць. Мы маем моцнае спадзяванне, верым у тое, што Ён «вытра слёзы з усіх твараў» і прыйдзе сапраўдны час весялосці і радасці ў Богу.
Каментарый да літургіі слова
«…Ты стол для мяне накрываеш
на вачах маіх ворагаў;
намашчваеш галаву маю алеем,
келіх мой перапоўнены...»
Чым з’яўляецца вяселле для кожнага з нас? Канешне, гэта радаснае здарэнне, сустрэчы родных людзей і яднанне. І ў Евангеллі сёння мы бачым, што людзі запрашаюцца для таго, каб быць разам, каб весяліцца і адпачываць. Толькі ўжо выбар застаецца за кожным чалавекам асобна. Вельмі цікавым момантам з’яўляецца тое, што кажа кароль: «Вяселле гатова, але запрошаныя не былі годнымі. Таму пайдзіце на ростані і ўсіх, каго сустрэнеце, запрасіце на вяселле». Ён хоча бачыць не толькі таго, каго загадзя запрасіў, але і тых, хто пагодзіцца быць з ім, толькі даведаўшыся пра свята.
Малітва вернікаў
Шчырым сэрцам просім Пана нашага:
- Адары нашага Папу Францішка і ўсіх біскупаў свету мудрасцю і любоўю ў іх няпростым пастырскім служэнні.
- Дадай уладам усіх краін разважлівасці ў дзеяннях, каб усё рабілі для дабрабыту грамадзян і не кіраваліся злобай ці нянавісцю.
- Даручаем Табе ўсіх церпячых і хворых, дадай ім вытрымкі і вернасці Табе.
- Прымі ў сваё Валадарства ўсіх, хто пакінуў гэты свет, няхай цешацца з Табой у вечнасці.
- Благаславі нас, прысутных ля Твайго алтара, каб вучыліся слухаць голас Бога, які хоча запрасіць нас на вечнае свята.
Праз Хрыста, Пана нашага. Амэн.
Падрыхтавала Рэгіна Гасанна Атрашкевіч ОРs
