Каментарый да літургіі і малітва вернікаў на XVІ Звычайную нядзелю, Год А (20 ліпеня)

Каментарый да літургіі

Бог, поўны міласэрнасці і дабрыні, прабачае грахі і цярпліва чакае навяртання, таму што любіць чалавека і хоча, каб кожны быў шчаслівы.

Мы жывём у свеце, у якім дабро і зло вельмі перамешаны, таму прыходзім у святыню, каб ад Хрыста атрымаць сілу і дапамогу ў перамозе дабра над злом. Прыходзім, каб атрымаць прабачэнне і міласэрнасць.

Бог міласціва чакае нашага навяртання, звернемся да Яго ўсім сэрцам і будзем прасіць прабачэння.

Каментарый да літургіі слова

Прыпавесць пра пустазелле сярод збожжа з’яўляецца вобразам Божай цярплівасці і міласэрнасці. Бог не карае зараз за зло, але чакае навяртання чалавека. Дабро ціхае і ціха ўзрастае, як Божае Валадарства. Усе мы грэшныя і слабыя, здольныя рабіць дабро і зло. Мы любім і ненавідзім. Важна ніколі не расчароўвацца і не дазволіць, каб пустазелле заняло месца пшаніцы на нашым полі. Трэба кожны дзень нанова ачышчаць сэрца ад “пустазелля”.

Сын Чалавечы памёр за грахі людзей і вызваліў нас ад панавання зла. За намі выбар, і калі выбіраем дабро, Бог не пакіне нас самотнымі, але будзе супрацоўнічаць, і сам Дух будзе заступацца за нас.

Бог, “які далікатна кіруе намі”, вучыць нас пакорнаму погляду на сябе і свет, які вакол нас. Дазволім Богу, каб Ён сам заняўся полем нашага жыцця.

Малітва вернікаў

Звернемся да Бога ў нашых малітвах, давяраючы Яго дапамозе, дабрыні і міласэрнасці.
Будзем паўтараць: Акажы нам, Пане, сваю міласэрнасць.

1. Просім за Паўсюдны Касцёл, каб спрыяў перамозе дабра на зямлі.
Акажы нам, Пане, сваю міласэрнасць.

2. Просім за маладых людзей, каб час дыяцэзіяльных сустрэч у Івянцы, Браславе і іншых месцах учыніў з іх адважных сведкаў Евангелля.
Акажы нам, Пане, сваю міласэрнасць.

3. Просім за ўсіх, якія ў гэты час адпачываюць, каб прыгажосць прыроды была для іх знакам дабрыні і ўсемагутнасці Створцы.
Акажы нам, Пане, сваю міласэрнасць.

4. Просім за грэшнікаў, каб атрымалі ласку навяртання і паядналіся з міласэрным Айцом.
Акажы нам, Пане, сваю міласэрнасць.

5. Просім за нашых памерлых, каб, ачышчаныя ад зла, як добрая пшаніца, апынуліся ў Валадарстве Бога.
Акажы нам, Пане, сваю міласэрнасць.

6. Просім, каб мы самі навучыліся перамагаць зло і пашыралі дабро ў свеце.
Акажы нам, Пане, сваю міласэрнасць.

Божа, спашлі свайго Духа, каб маліўся ў нас, заступаўся за нас і дапамагаў нам выпрошваць Тваю міласэрнасць, прабачэнне і дапамогу, каб напрыканцы свету мы знайшлі ў Табе Айца, поўнага міласэрнасці, і маглі ўдзельнічаць у радасці Твайго вечнага Валадарства. Праз Хрыста, Пана нашага. Амэн.

С. Мірыям Маршалэк ZSJM