К.: Божа, прыйдзі мне на дапамогу.
Н.: Пане, паспяшы да мяне на паратунак.
Хвала Айцу і Сыну,
і Духу Святому.
Як была спрадвеку, цяпер і заўсёды,
і на векі вечныя. Амэн. Аллелюя.
Гiмн
Валадар магутны, Хрыстэ,
Каб Айцец быў праслаўлёны
І наш род людскі узняты,
Разарваў Ты путы смерці.
Ты, прыняўшы нашу слабасць,
Растаптаў старога змея,
І сваёю смерцю знішчыў
Смерць, што грэх падрыхтаваў нам.
Ты сваім уваскрасеннем
У Пасхальнай таямніцы
Дар жыцця ў нас аднаўляеш,
Хоць грэх быў прычынай смерці.
Дай нам, Пане, Тваю ласку.
Мы запалім светач веры,
Каб сустрэць Цябе ў чаканні
І з надзеяй на збаўленне.
Прымі ўсіх, Суддзя ласкавы,
У Нябесным Валадарстве,
Хто у веры і любові
Вызнае Святую Тройцу.
Слугаў Ты пакліч, о Божа,
Што свет гэты пакідаюць.
Ім дазволь ў жыцця краіне
Праслаўляць Цябе навекі. Амэн.
Псальмодыя
1 ант. Пан захавае цябе ад усякага зла, * будзе берагчы душу тваю.
Псальм 121 (120)
Падымаю вочы свае да вышыняў: *
адкуль прыйдзе мая дапамога?
Дапамога мая ад Пана, *
які стварыў неба і зямлю.
Ён не дасць пахіснуцца назе тваёй, *
не задрэмле той, хто цябе сцеражэ.
Не дрэмле і не спіць *
той, хто сцеражэ Ізраэль.
Пан сцеражэ цябе, *
Пан — твой цень, Ён праваруч цябе.
Удзень сонца не ўдарыць цябе, *
ні месяц ноччу.
Пан захавае цябе ад усякага зла, *
будзе берагчы душу тваю.
Пан будзе сцерагчы выйсце тваё і вяртанне *
цяпер і навекі.
Хвала Айцу і Сыну, *
і Духу Святому.
Як была спрадвеку, цяпер і заўсёды, *
і на векі вечныя. Амэн.
Ант. Пан захавае цябе ад усякага зла, * будзе берагчы душу тваю.
2 ант. Калі Ты, Пане, будзеш зважаць на беззаконні, * хто ж вытрывае, Пане?
Псальм 130 (129)
З глыбіні я клічу Цябе, Пане. *
Пане, пачуй мой голас.
Няхай Твае вушы пачуюць *
голас маіх малітваў.
Калі Ты, Пане, будзеш зважаць на беззаконні, *
хто ж вытрывае, Пане?
Але ў Цябе прабачэнне, *
каб Цябе паважалі.
Спадзяюся на Пана, *
спадзяецца душа мая на Яго слова.
Душа мая чакае Пана *
больш, чым варта світання.
Больш, чым варта світання, *
няхай Ізраэль чакае Пана,
бо ў Пана міласэрнасць *
і шчодрае ў Яго адкупленне.
Ён адкупіць Ізраэль *
ад усіх беззаконняў ягоных.
Хвала Айцу і Сыну, *
і Духу Святому.
Як была спрадвеку, цяпер і заўсёды, *
і на векі вечныя. Амэн.
Ант. Калі Ты, Пане, будзеш зважаць на беззаконні, * хто ж вытрывае, Пане?
3 ант. Як Айцец уваскрашае і ажыўляе памерлых, * так і Сын, каго хоча, ажыўляе.
Песня Флп 2, 6-11
Езус Хрыстус, будучы ў постаці Бога, *
не скарыстаў з таго, каб быць нароўні з Богам,
але выракся самога сябе, прыняўшы постаць слугі, †
прыпадобніўшыся да людзей; *
і з выгляду стаўшы як чалавек,
прынізіў сябе, †
будучы паслухмяным ажно да смерці, *
смерці крыжовай.
Таму Бог узвысіў Яго *
і даў Яму імя па-над усялякае імя,
каб на імя Езуса схілілася кожнае калена *
стварэнняў нябесных, зямных і падземных,
і каб кожны язык вызнаваў: †
«Панам ёсць Езус Хрыстус», *
дзеля хвалы Бога Айца.
Хвала Айцу і Сыну, *
і Духу Святому.
Як была спрадвеку, цяпер і заўсёды, *
і на векі вечныя. Амэн.
Ант. Як Айцец уваскрашае і ажыўляе памерлых, * так і Сын, каго хоча, ажыўляе.
Кароткае Чытанне 1 Кар 15, 55-57
«Cмерць, дзе твая перамога? Смерць, дзе тваё джала?» Джала смерці — гэта грэх, а сіла граху — гэта Закон. Богу ж падзяка, бо Ён даў нам перамогу праз нашага Пана Езуса Хрыста.
Кароткi рэспансорый
К.: На Цябе, Пане, спадзяюся, * не буду асаромлены навекі.
Н.: На Цябе, Пане, спадзяюся, * не буду асаромлены навекі.
К.: Узрадуюся і ўсцешуся міласэрнасці Тваёй.
Н.: Не буду асаромлены навекі.
К.: Хвала Айцу і Сыну, * і Духу Святому.
Н.: На Цябе, Пане, спадзяюся, * не буду асаромлены навекі.
Песня з Евангелля
Ант. да песні Марыі: Кожны, каго дае Мне Айцец, * да Мяне прыйдзе, / і таго, хто прыходзіць да Мяне, / Я не адкіну.
Альбо, у Велікодны перыяд:
Ант. Укрыжаваны ўваскрос з памерлых * і адкупіў нас, / аллелюя.
Песня Марыі Лк 1, 46-55
Велічае душа мая Пана, *
і ўзрадаваўся дух мой у Богу, маім Збаўцу.
Бо глянуў Бог на пакору сваёй слугі,*
і цяпер благаслаўляць мяне будуць усе пакаленні.
Бо вялікае ўчыніў мне Усемагутны, *
а імя Яго святое.
І міласэрнасць Яго з пакалення ў пакаленне *
над тымі, хто Яго баіцца.
Паказаў моц сваёй правіцы, *
рассеяў тых, хто пыхлівы сэрцам.
Скінуў магутных з трона *
і ўзвысіў пакорных.
Дабром галодных насыціў, *
а багатых ні з чым адправіў.
Прыняў свайго слугу Ізраэля, *
памятаючы пра сваю міласэрнасць,
як абяцаў бацькам нашым — *
Абрагаму і яго патомству навекі.
Хвала Айцу і Сыну, *
і Духу Святому.
Як была спрадвеку, цяпер і заўсёды, *
і на векі вечныя. Амэн.
Ант.: Кожны, каго дае Мне Айцец, * да Мяне прыйдзе, / і таго, хто прыходзіць да Мяне, / Я не адкіну.
Альбо, у Велікодны перыяд:
Ант. Укрыжаваны ўваскрос з памерлых * і адкупіў нас, / аллелюя.
Просьбы
Хрыстэ Пане, мы спадзяемся, што Ты прыпадобніш нашае прыніжанае цела да свайго праслаўленага Цела. Таму ўсклікаем:
Пане, Ты жыццё і ўваскрашэнне нашае.
Хрыстэ, Сыне Бога жывога, Ты ўваскрасіў з памерлых Лазара, свайго прыяцеля,
— уваскрашай да жыцця і славы памерлых, якіх Ты адкупіў сваёй каштоўнаю крывёю.
Пане, Ты жыццё і ўваскрашэнне нашае.
Хрыстэ, суцяшыцель засмучаных, падчас уваскрашэння Лазара, юнака з Наім і дачкі Яіра, Ты міласэрна выцер слёзы блізкіх,
— суцеш усіх, хто сёння плача над сваімі памерлымі.
Пане, Ты жыццё і ўваскрашэнне нашае.
Хрыстэ Збаўца, знішчы ў нашым смяротным целе панаванне граху, праз які мы заслужылі пакаранне смерцю,
— каб праз Цябе мы атрымалі вечнае жыццё.
Пане, Ты жыццё і ўваскрашэнне нашае.
Хрыстэ Адкупіцель, паглядзі на тых, хто, не ведаючы Цябе, не мае надзеі,
— каб яны паверылі ва ўваскрашэнне і жыццё вечнае.
Пане, Ты жыццё і ўваскрашэнне нашае.
Хрыстэ, Ты вярнуў невідушчаму святло зроку і даў яму радасць бачыць Цябе,
— асвятлі твары сваіх памерлых, якія дагэтуль пазбаўлены святла.
Пане, Ты жыццё і ўваскрашэнне нашае.
Хрыстэ, Ты дазваляеш, каб распадаўся зямны дом нашага жылля,
— дай нам вечны і нерукатворны дом у небе.
Пане, Ты жыццё і ўваскрашэнне нашае.
Ойча наш
Малітва
Божа, святло верных і жыццё справядлівых, Твой Сын адкупіў нас сваёю смерцю і ўваскрасеннем, змілуйся над слугой Тваім (Тваёй) N., які жыў (якая жыла) з вераю ва ўваскрашэнне з мёртвых, і адары яго (яе) вечным шчасцем. Праз Пана нашага, Езуса Хрыста, Твайго Сына, які з Табою жыве і валадарыць у еднасці Духа Святога, Бог, праз усе вякі вечныя. Амэн.
Афіцый завяршаецца благаслаўленнем святара або наступным чынам:
Няхай Пан благаславіць нас, абароніць ад усялякага зла і давядзе да жыцця вечнага.
Н.: Амэн.
