Біскуп каад’ютар Гродзенскай дыяцэзіі Уладзімір Гуляй
Ксёндз канонік Уладзімір Гуляй нарадзіўся 14 чэрвеня 1975 г. у Ваўкавыску, другое дзіця ў сям’і Юрыя Гуляя і Марыі Гуляй (Невалеўскай). Быў ахрышчаны ў касцёле Найсвяцейшай Тройцы ў Росі каля Ваўкавыска.
Пасля заканчэння ў 1992 г. сярэдняй школы і здачы экзаменаў паступіў у Вышэйшую духоўную семінарыю ў Гродне. У 1992-1998 гг. вывучаў у семінарыі філасофію і тэалогію.
29 верасня 1997 г. прыняў дыяканскае пасвячэнне, 26 чэрвеня 1999 г. – прэзбітэрскае, удзеленае ў гродзенскай катэдры біскупам Аляксандрам Кашкевічам.
Атрымаўшы ў Люблінскім каталіцкім універсітэце ступень магістра тэалогіі, у 1998-2001 гг. вучыўся ў тым жа ўніверсітэце ў дактарантуры (спецыялізацыя “дагматычная тэалогія”), у 2000 г. абараніў ліцэнцыят, у 2011 г. – дактарат.
У 2000-2001 гг. ажыццяўляў душпастырскую працу ў якасці вікарыя ў парафіі св. Францішка Ксаверыя ў Гродне. З 2000 г. выконваў функцыі дыяцэзіяльнага душпастыра моладзі.
У 2001 г. быў прызначаны прэфектам і выкладчыкам дагматычнай тэалогіі Вышэйшай духоўнай семінарыі ў Гродне. Доўгі час з’яўляецца выкладчыкам тэалогіі ў Тэалагічным каледжы імя св. Казіміра ў Гродне, а таксама на “Курсах сямейнага жыцця” пры Канферэнцыі Каталіцкіх Біскупаў у Беларусі.
З 2003 г. з’яўляецца пробашчам парафіі Узвышэння Святога Крыжа ў Лідзе.
У 2006 г. быў прызначаны біскупскім вікарыем па справах агульнага душпастырства Лідскага рэгіёна і членам святарскай рады, выконвае гэтыя функцыі да сённяшняга дня. Таксама з’яўляецца членам Дыяцэзіяльнай камісіі па справах пасвячэнняў і служэнняў.
З 19 мая 2016 г. па волі дыяцэзіяльнага біскупа належыць да катэдральнага капітулу Унебаўзяцця Найсвяцейшай Панны Марыі і св. Казіміра ў Гродне як канонік з грэміяльнай пасадай тэолага.
З 2016 г. выконвае функцыі дыяцэзіяльнага цэнзара, з 2018 г. належыць да калегіі кансультантаў Гродзенскай дыяцэзіі, а таксама з’яўляецца старшынёй Сінадальнай камісіі па справах экуменізму і міжрэлігійнага дыялогу Гродзенскай дыяцэзіі.
5 красавіка 2024 года, Яго Святасць Папа Францішак прызначыў ксяндза каноніка Уладзіміра Гуляя, біскупам каад’ютарам Гродзенскай дыяцэзіі.
