31 кастрычніка 2019 года па рашэнні Папы Францішка ў Агульны Рымскі каляндар, які дзейнічае ва ўсім Касцёле, быў унесены літургічны ўспамін Найсвяцейшай Панны Марыі Ларэтанскай, які пачаў адзначацца 10 снежня.
Культ Маці Божай Ларэтанскай цесна звязаны з санктуарыем Святога дамка ў Ларэта. Згодна з традыцыяй, у ноч з 9 на 10 снежня 1294 года ў гэты італьянскі горад на ўзбярэжжы Адрыятычнага мора была ці то перанесеная анёламі, ці то перавезеная італьянскай сям’ёй з прозвішчам Анджэлі ўнікальная рэліквія — дамок Святой Сям’і з Назарэта, у якім адбылося Звеставанне.
Святыня, дзе знаходзіцца дамок, стала першым міжнародным марыйным санктуарыем, які наведваюць шматлікія пілігрымы яшчэ з часоў Сярэднявечча.
Згаданы санктуарый, шчыльна звязаны з Апостальскай Сталіцай, праслаўлены Найвышэйшымі Пантыфікамі і паўсюдна вядомы, на працягу доўгага часу выдатна паказваў, не менш за Назарэт на Святой Зямлі, евангельскія цноты Святой Сям’і.
У Святым дамку перад цудадзейнаю фігураю Маці Збавіцеля і Маці Касцёла на працягу стагоддзяў святыя і благаслаўлёныя давалі адказ на скіраванае да іх пакліканне, хворыя прасілі суцяшэння ў цярпенні, Божы народ распачаў праслаўляць і маліць Найсвяцейшую Панну Марыю Ларэтанскай літаніяй, вядомай ва ўсім свеце.
