З векапомных часоў на нашых землях ад Віленшчыны да Піншчыны існуе прыгожы звычай ставіць прыдарожныя крыжы і каплічкі, якія з’яўляюцца не толькі выразам пабожнасці нашага народа, але і важным элементам народнай культуры.
Шмат гэтых помнікаў веры і гісторыі захавалася і на Гродзеншчыне. Калектыўная памяць мясцовых жыхароў зберагла нямала гісторый, звязаных з прыдарожнымі крыжамі і капліцамі, якія перадаюцца з пакалення ў пакаленне.
Каб захаваць гэтую каштоўную спадчыну, што мае як матэрыяльную, так і нематэрыяльную складаныя, дыяцэзіяльная курыя ў Гродне пачала працу над падрыхтоўкай альбома, прысвечанага гэтай малавывучанай тэме. Цяпер ідзе збор матэрыялаў, неабходных для рэалізацыі гэтага рэлігійна-культурнага праекту.
У яго межах курыя Гродзенскай дыяцэзіі звяртаецца да ўсіх вернікаў з просьбай аб зборы і перадачы інфармацыі, якая датычыцца прыдарожных крыжоў і капліц, што знаходзяцца на тэрыторыі іх парафій.
Цікавасць уяўляюць архіўныя дакументы, успаміны і сведчанні парафіянаў, сучасныя ці гістарычныя здымкі, любая іншая інфармацыя і матэрыялы, якія прыдадуцца ў падрыхтоўцы альбома.
Усе архіўныя дакументы, успаміны і сведчанні, а таксама здымкі трэба дасылаць або асабіста дастаўляць у дыяцэзіяльную курыю ў Гродне. Можна перадаць іх душпастырам, якія потым перададуць матэрыялы ў курыю.
Матэрыялы ў электронным выглядзе можна даслаць праз інтэрнэт на адрас: grodnensis@gmail.com, пазначыўшы тэму ліста «Прыдарожныя крыжы».
