15 лістапада 2009 г. у бярозаўскім касцёле Маці Божай Міласэрнасці (Докшыцкі дэканат, Віцебская дыяцэзія) адбылося парафіяльнае свята. Урачыстасць Маці Божай Вастрабрамскай адзначаецца 16 лістапада, аднак дзеля зручнасці вырашана было перанесці святкаванне на нядзелю.

У святкаванні прымалі ўдзел шматлікія вернікі з Бярозаўкі і яе ваколіц. Перад святой Імшой адбылася адарацыя Найсвяцейшага Сакрамэнту і малітва. Вернікі мелі магчымасць прыступіць да сакрамэнту пакаяння. Падчас літургіі гамілію прамовіў кс. Віктар Місевіч, які засяродзіўся на тэме набліжэння чалавека да Бога па прыкладу Марыі.

У бярозаўскай парафіі працуюць айцы-капуцыны з Докшыц. Дзякуючы іх руплівай працы, сістэматычна адпраўляецца святая Імша ў капліцы, а для дзяцей праводзяцца заняткі па рэлігіі. Аднаўленне святыні адбываецца таксама пад кіраўніцтвам айцоў-капуцынаў. Галоўны алтар капліцы ўяўляе сабой макет Вострай Брамы з выявамі Маці Божай, св. Францішка Асізскага і св. Серафіма Сароўскага. Гэтыя выявы сімвалізуюць супольны шлях да неба, якім разам крочаць праваслаўныя і католікі Бярозаўкі.