1 сакавіка найстарэйшаму кардыналу Каталіцкага Касцёла Аляшандры ду Нашымэнту з Анголы споўніцца 99 гадоў
Як нагадвае Каталіцкае інфармацыйнае агенцтва KAI, з 1986 па 2001 год кардынал ду Нашымэнту быў арцыбіскупам сталічнай ангольскай дыяцэзіі Луанды. Раней ён быў біскупам свайго роднага горада Маланье (1975–1977) і арцыбіскупам Лубангі (1977–1986).
Чатырохтыднёвае выкраданне ду Нашымэнту групай ангольскіх паўстанцаў уврсень 1982 года выклікала сусветны рэзананс.
Папа Ян Павел II (1978–2005) публічна заклікаў выкрадальнікаў вызваліць іерарха. У 1983 годзе ён уключыў ду Нашымэнту ў Калегію Кардыналаў. У 1983–1991 гадах ду Нашымэнту быў старшынёй Дабрачыннага каталіцкага таварыства Caritas Internationalis.
Аляшандры ду Нашымэнту нарадзіўся 1 сакавіка 1925 года, атрымаў святарскае пасвячэнне ў 1952 годзе. Падчас вайны за незалежнасць супраць партугальскіх каланіяльных уладаў у 1961 годзе ён быў высланы ў выгнанне ў Лісабон, дзе на працягу дзесяці гадоў працаваў парафіяльным душпастырам.
Іерарх з’яўляецца пятым найстарэйшым кардыналам у гісторыі Касцёла, а 9 сакавіка 2024 года можа стаць чацвёртым.
У цяперашні час Калегія кардыналаў налічвае 239 кардыналаў, у тым ліку 129 выбаршчыкаў і 110 тых, якія па ўзросце не маюць права ўдзелу ў канклаве.
