Да Велікодных святаў, якія сёлета католікі распачалі адзначаць 31 сакавіка, з друку выйшаў красавіцкі нумар часопіса «Ave Maria» (№ 4 (349) 2024).
Агляд велікоднага нумару прапануецца на сайце аднаго з найпапулярнейшых у нашай краіне каталіцкіх часопісаў ave-maria.by.
Страх і адвага — гэтыя паняцці неадлучна спадарожнічаюць евангельскім апісанням мукі і ўваскрасення Хрыста. Яны ж уваходзяць і ў нашае жыццё ў самыя няпростыя, пераломныя моманты і могуць прыносіць свае асаблівыя плады, калі мы ў сваіх перажываннях спрабуем чэрпаць сілу ад Уваскрослага.
Таму невыпадкова паняцці страху і адвагі закранаюцца ў многіх матэрыялах красавіцкага нумара «Ave Maria».
Айцец Юрый Кулай OCD у артыкуле «Тамаш не верыць» (рубрыка «Школа малітвы») разважае пра тое, чаму мы не маем жывой радасці ад надзеі на ўваскрашэнне, а таксама пра тое, што кожнага з нас чакае асабістая сустрэча з Езусам уваскрослым і выпрабаванне нашай веры, падобнае да Тамашовага.
«Чаго баяцца католікі?» — у матэрыяле пад такою назваю айцец Дар’юш Кавальчык SІ дзеліцца сваімі думкамі пра страх вернікаў за лёс Касцёла. Многім вернікам вельмі добра знаёмы страх перад споведдзю — пра яе асабістае перажыванне піша святая Фаўстына Кавальская, думкі якой сабраныя ў артыкуле пад назваю «Спаведнік — гэта лекар душы». Абодва матэрыялы падрыхтавала і пераклала з польскай рэдактар часопіса Крыстына Лялько.
Тэрэза Клімовіч у публікацыі «Божае святло супраць самых вялікіх страхаў» акцэнтуе ўвагу чытачоў на тым, што ёсць добры страх, які бароніць чалавека, і дрэнны, які руйнуе.
«Ці ёсць ува мне той страх, які забірае жыццё? Колькі яго? Які ён?» — аўтарка запрашае кожнага паразважаць над гэтымі пытаннямі з выкарыстаннем духоўнага практыкавання, асноваю якога з’яўляецца ігнацыянскі рахунак сумлення.
Сваім жыццёвым досведам у пераадоленні розных страхаў і трывогаў дзеляцца Паліна Грыб («Я баюся… цішыні»), Іна Амельчанка («У любові няма страху») і Ганна Шаўчэнка («Як вытрываць у „Аліўным садзе“ душы?»), а Галіна Калевіч прапануе на старонках часопіса інтэрв’ю з Кацярынай Расохай («Не бойся. Толькі вер»), якая ў аповедзе пра сваё навяртанне сцвярджае, што «адвага — гэта поўны давер Пану Богу і разуменне таго, што, калі Бог дае табе нейкае заданне, то абавязкова дасць і сілы для яго выканання».
Гэтыя і шматлікія іншыя цікавыя матэрыялы, сабраныя ў рубрыках «Святар адказвае на пытанне», «Старонка псіхолага», паэзія і рэпартажы, можна прачытаць у красавіцкім нумары часопіса «Ave Maria». На апошніх старонках вокладкі прапануюцца «Малітвы да ўваскрослага Езуса Хрыста».
