У суботу 16 снежня ў касцёле Найсвяцейшай Тройцы (святога Роха) на Залатой горцы ў Мінску ўдзельнікі апостальскага руху «Маргарытка» з розных парафій Мінска-Магілёўскай архідыяцэзіі сабраліся на штомесячную сустрэчу, якая ў перыяд Адвэнту спалучаецца з даўняй традыцыяй дзялення аплаткай і пажаданнямі на Божае Нараджэнне.
Сустрэча распачалася канферэнцыяй, якую прамовіў ксёндз Павел Эйсмант, мадэратар гэтага апостальскага руху, мэта якога — няспынная малітва за святароў.
У канферэнцыі прагучалі сведчанні святароў аб перажыванні імі перыяду Адвэнту, узятыя з адкрытых крыніц, а потым дзве ўдзельніцы руху падзяліліся сваімі сведчаннямі падрыхтоўкі да Божага Нараджэння ў іх сем’ях.
Падчас выстаўлення Найсвяцейшага Сакрамэнту ўдзельнікі супольна маліліся Ружанец за святароў і кансэкраваных асоб.
Цэлебрацыю святой Імшы для сабраных у Залатагорскай святыні ўзначаліў Мітрапаліт Мінска-Магілёўскі арцыбіскуп Юзаф Станеўскі. У прамоўленай гаміліі іерарх заахвоціў прысутных, каб яны, рыхтуючыся на працягу Адвэнту, клапаціліся пра сваё духоўнае жыццё, бо яно нашмат больш багатае, чым мы сабе ўяўляем. Ён параўнаў яго з акіянам, які, паводле навуковых дадзеных, нашмат больш багаты на разнастайныя віды жывых істот, чым сухапутны свет.
«І нават калі няма ў ім прыгожых птушак, якія спяваюць, то ў ім ёсць шмат незвычайных відаў рыб, многія з якіх не саступаюць у прыгажосці птушкам», — заўважыў іерарх.
Пасля стала Божага слова і Эўхарыстыі ўдзельнікі сустрэчы сабраліся вакол стала, застаўленага «зямнымі» стравамі, галоўнай з якіх быў просты белы хлеб, які мы называем аплаткай.
