У нядзелю 15 жніўня, ва ўрачыстасць Унебаўзяцця Найсвяцейшай Панны Марыі, на Залатой Горцы ў Мінску адбудзецца вялікі фэст Маці Божай Зельнай і святога Роха.
Урачыстасць Унебаўзяцця Найсвяцейшай Панны Марыі ў народзе называецца «Маці Божай Зельнай», паколькі існуе традыцыя ў гэты дзень благаслаўляць зёлкі і кветкі, а таксама першыя плёны новага ўраджаю: збожжа, садавіну і гародніну.
З гэтай нагоды ў парафіі Найсвяцейшай Тройцы (святога Роха) на Залатой Горцы ў Мінску (пр. Незалежнасці, 44 А) адбудзецца цэлебрацыя ўрачыстай святой Імшы на палявым алтары каля касцёла, падчас якой святар благаславіць зёлкі і плады сёлетняга ўраджаю.
Пачатак цэлебрацыі ў 12.30.
У найстаражытнейшай каталіцкай парафіі беларускай сталіцы ўрачыстасць Унебаўзяцця Найсвяцейшай Панны Марыі традыцыйна з’яўлялася адпустовай. Гэта быў адзін з тытулаў Залатагорскай парафіі, а ў цэнтральным алтары касцёла знаходзіцца, як і калісьці, абраз Маці Божай Унебаўзятай.
Пасля Імшы запланавана культурная праграма і час, каб падзяліцца сакрэтамі вырошчвання і выкарыстання раслін.
У панядзелак 16 жніўня адзначаецца ўрачыстасць святога Роха — апекуна Мінска і асаблівага ратаўніка ад хваробаў і эпідэмій.
Урачыстыя святыя Імшы ў Залатагорскім касцёле ў гэты дзень будуць цэлебравацца ў 8.00, 12.00 і 18.30.
Цэлебрацыю святой Імшы ў 18.30 узначаліць Апостальскі адміністратар sede vacante Мінска-Магілёўскай архідыяцэзіі біскуп Казімір Велікаселец.
