15 чэрвеня біскуп Віцебскі Алег Буткевіч удзяліў сакрамэнт канфірмацыі 120 вернікам у парафіі Святой Тройцы ў Глыбокім. У гэты дзень парафія святкавала адпустовую ўрачыстасць.

Біскуп прызнаўся, што з вялікім хваляваннем прыбыў у глыбоцкую парафію, бо, як малады ардынарый, яшчэ шмат пазнае, а святыня, поўная вернікаў, вельмі яго ўзрушвае. “На гэтай прыгожай зямлі інакш і быць не можа”, - адзначыў іерарх.

На ўрачыстасці прысутнічалі старшыня Глыбоцкага райвыканкама Алег Морхат, старшыня Глыбоцкага раённага Савета дэпутатаў Галіна Унуковіч, прадстаўнікі мясцовых прадпрыемстваў. Падчас Імшы маліліся аб супакоі ва ўсёй краіне, а асабліва за родны горад Глыбокае і яго жыхароў.

У гаміліі біскуп заклікаў вернікаў углядацца ў еднасць Святой Тройцы, у Божую еднасць, бо менавіта яе не хапае сучаснаму асяроддзю, сучаснай сям’і.

На заканчэнне Эўхарыстыі прайшла працэсія з Найсвяцейшым Сакрамэнтам. Урачыстасць скончылася асаблівым жэстам: біскуп разам з хлопцам і дзяўчынай выпусцілі трох белых галубоў на знак супакою ў Глыбокім.

Паводле catholicnews.by

(AG)