10 і 11 жніўня ў канадскім горадзе Мідланд архідыяцэзіі Таронта прайшлі ўрачыстасці, прысвечаныя памяці канадскіх мучанікаў XVII стагоддзя. Санктуарый знаходзіцца ў 150-ці кіламетрах ад Таронта, сталіцы правінцыі Антарыа. Ва ўрачыстасцях прымаў удзел мітрапаліт Мінска-Магілёўскі арцыбіскуп Тадэвуш Кандрусевіч.

 

Пешшу, аўтобусамі, на аўмабілях — сотні пілігрымаў штогод прыбываюць у Мідланд, каб ушанаваць памяць шасці езуітаў, якія чатыры стагоддзі таму першымі прынеслі на гэтыя землі Евангелле. Прапаведуючы веру ў Хрыста, шэсць езуітаў — чатыры святары і два браты, ахвяравалі за веру сваім  жыццём.

Сёлета з Таронта ў Мідланд пешая пілігрымка вырушыла 5 жніўня. Група налічвала каля 400-от пілігрымаў і з кожным днём іх колькасць павялічвалася. 10 жніўня, калі да пілігрымкі далучыўся беларускі іерарх, колькасць пілігрымаў дасягала ўжо 800-а чалавек.

 

 

Арцыбіскуп Тадэвуш Кандрусевіч прайшоў з канадскімі пілігрымамі апошні этап пілігрымкі, завяршыўшы яе святой Імшой на алтары, дзе ў 1984 г. Эўхарыстыю цэлебраваў бл. Папа Ян Павел II. У гаміліі беларускі іерарх прыпомніў аб тым, што кроў мучанікаў з’яўляецца насеннем хрысціян. Зярно Евангелля, якое пасеялі на гэтай зямлі першыя мучанікі, дало багаты ўраджай і на зямлі індзейцаў моцна ўкаранілася хрысціянства. Мітрапаліт распавёў пра пераслед веры і пра ганенні хрысціян у былым СССР,  зазначаючы, што толькі дзякуючы сем’ям і хрысціянскай традыцыі ў іх, вера захавалася.

 

Іерарх звярнуў увагу на новыя выклікі сучаснасці, якія аслабляюць веру, і заахвоціў прысутных быць актыўнымі ўдзельнікамі працэсу новай евангелізацыі, у якой асаблівае месца займаюць пілігрымкі. Менавіта яны, паводле арцыбіскупа Кандрусевіча, з’яўляюцца сведчаннем прыналежнасці да Хрыста і дзякуючы якім няверуючыя людзі і тыя, хто сваю веру занядбаў, могуць наноў яе адкрыць.

11 жніўня ў санктуарыі ў гонар Унебаўзяцця Найсвяцейшай Панны Марыі адбылася святая Імша, якую ўзначаліў Тадэвуш Кандрусевіч. 

У набажэнстве прыняла ўдзел вялікая колькасць верніваў, многія з якіх прыязджалі ў Мідланд цэлымі сем’ямі — толькі святой Камуніі падчас Імшы было раздадзена дзевяць з паловай тысяч (!). 

У гаміліі арцыбіскуп Кандрусевіч удзяліў асаблівую ўвагу праўдзе веры аб Унебаўзяцці Найсвяцейшай Панны Марыі і падкрэсліў, што яе сучаснасць — гэта наша будучыня (пры ўмове, што мы будзем, як Марыя, заўсёды згаджацца з Божай воляй). Беларускі іерарх таксама падкрэсліў ролю Марыі як першага евангелізатара — яна прынесла ў дом Захарыі і Альжбеты яшчэ ненароджанага Езуса, які пачаў дзейнічаць сваёй ласкай, пазбавіўшы першароднага граху яшчэ не народжанага Яна Хрысціцеля ва ўлонні Альжбеты. 

«Галоўній місіяй Касцёла з’яўляецца евангелізацыя, якую ўжо на працягу 20-ці стагоддзяў праводзяць місіянеры, святары, кансэкраваныя асобы і проста вернікі. Такімі былі і канадскія мучанікі, якія першымі прынеслі на гэтую зямлю святло Евангелля», — зазначыў беларускі іерарх.

 

 

Тадэвуш Кандрусевіч нагадаў пра значэнне фацімскіх аб’яўленяў, якія сталі надзеяй для людзей падчас пераследу рэлігіі ў былым СССР:

«Менавіта яны давалі людзям надзею на лепшае заўтра, на свабоду веравызнання, якая настала». 

Арцыбіскуп падкрэсліў, што ў наш час хрысціянства з’яўляецца найбольш пераследуемай рэлігіяй і што хрысціяне гінуць сёння ў многіх краінах.

«Але існуе яшчэ і іншы пераслед, — зазначыў Кандрусевіч, — калі рэлігію стараюцца спіхнуць на перыферыю жыцця сучаснага грамадства, калі большасцю галасоў у парламентах прымаюць не згодныя з Божым правам законы і нават забараняюць хрысціянскія сімвалы».

 

Арцыбіскуп заклікаў жыхароў Канады памятаць пра першых хрысціянскіх мучаніках гэтай зямлі, дзякуючы за пасеянае імі зерне Евангелля, а таксама па прыкладзе Марыі адказваць Богу «так», за што Бог увядзе вернікаў у радасць вечнага шчасця, якой у Божым Валадарстве цешыцца Марыя.