Праваслаўны Патрыярх Канстанцінопальскі Барталамей заявіў, што Папа Францішак мае намер прыехаць у Турцыю ў 2025 годзе.
Нагода для паездкі — 1700-годдзе Нікейскага Сабору, інфармуе Беларуская рэдакцыя парталу Vatican News. Сайт Orthodox Times паведаміў, што Папа Францішак хоча наведаць Патрыярха Барталамея ў яго сядзібе на Фанары ў Стамбуле і гістарычнае месца Нікею — сучасны горад Ізнік, дзе ў 787 годзе таксама праходзіў другі Сабор.
На першым Саборы ў Нікеі, скліканым рымскім імператарам Канстанцінам I, быў сфармуляваны Нікейскі сімвал веры. Да сённяшняга дня гэта хрысталагічнае веравызнанне аб’ядноўвае ўсе хрысціянскія Цэрквы і касцёльныя супольнасці на Усходзе і Захадзе.
Папа хацеў бы, каб мы «разам адзначылі гэты важны юбілей»,
— сказаў Патрыярх Барталамей у кулуарах міжнароднай канферэнцыі, арганізаванай у Лісабоне Цэнтрам міжрэлігійнага і міжкультурнага дыялогу (KAICIID).
Экуменічны Патрыярх Канстанцінопальскі выступіў з прывітальнай прамовай, якая адкрыла шматдзённы Глабальны дыялог. Ён ў чарговы раз заклікаў паважаць правы чалавека і чалавечую годнасць ва ўсім свеце і прыкласці больш намаганняў для дасягнення міру і экалагічнай устойлівасці.
