7 снежня Генеральны вікарый Мінска-Магілёўскай архідыяцэзіі біскуп Юрый Касабуцкі адзначыць 25-ю гадавіну з моманту прэзбітэрскага пасвячэння. Святары і кансэкраваныя асобы змогуць асабіста павіншаваць іерарха падчас сустрэчы 9 снежня.
На сваёй старонцы ў сацыяльнай сетцы Facebook біскуп Касабуцкі напісаў:
«У гэты дзень, 7 снежня 1996 года, у мінскай архікатэдры я разам з маімі сабратамі Аляксандрам Чайкоўскім (сёння пробашч парафіі у Наваполацку), Янам Крэмісам (сёння пробашч парафіі Святога Духа ў Мнску, Чыжоўка) і Уладзіславам Шышлам (сёння пробашч парафіі ў Шэметаве Мядзельскага раёна) атрымалі пасвячэнне прэзбітэрату з рук кардынала Казіміра Свёнтэка.
Святую Імшу падзякі Богу за дар святарства з нагоды срэбранага юбілею я планую цэлебраваць 7 снежня ў 18.30 у мінскай архікатэдры (пл. Свабоды 9).
Запрашаю да супольнай малітвы ў архікатэдры альбо далучыцца on-line, каб разам падзякаваць Богу.
Пачатак трансляцыі ў 18.30.
За гэтыя 25 гадоў служэння Богу ў святарстве я перажыў шмат розных выпрабаванняў, здабыў вялікі досвед служэння Богу і людзям у якасці святара і пазней біскупа. Спадзяюся, што маё служэнне было выкананнем Божай волі. Я заўсёды імкнуўся рабіць усё згодна з тым, што падказвае маё сумленне, быць разам з тымі людзьмі, якіх Бог даваў мне на маім жыццёвым шляху. За ўсё гэта я буду дзякаваць Богу ў гэты дзень», — напісаў біскуп Юрый Касабуцкі.
Увага! У сувязі са складанай эпідэмічнай сітуацыяй і невялікімі памерамі прэзбітэрыя мінскай архікатэдры колькасць удзельнікаў цэлебрацыі 7 снежня абмежавана.
Святары і кансэкраваныя асобы змогуць асабіста павіншаваць іерарха падчас аплаткавай сустрэчы, якая адбудзецца ў мінскім архікатэдральным касцёле Найсвяцейшага Імя Марыі 9 снежня а 11-й гадзіне.
