Пошук


Фота: planetabelarus.by
Адрас:
вул. П. Броўкі, 6
в. Ушачы, 211480

Ушацкі р-н
Віцебская вобл.
Рэспубліка Беларусь


Тэл.: +375 2158 2 29 77

Расклад набажэнстваў (магчымы змены)  

  • Св. Імша ў нядзелю — 11.00
  • Св. Імша ў будні — 10.00, 18.00

Адпуст: успамін св. Лаўрэнція – 10 жніўня

З гісторыі парафіі

Парафія ва Ушачах бярэ свой пачатак з 1716 г., калі Геранім Жаба, падваявода полацкі, прывёз сюды айцоў дамініканаў, якія пабудавалі тут касцёл пад тытулам св. Гераніма і кляштар. Напачатку святыня належала парафіі Кублічы, а з 1793 г. стала парафіяльнай. Гэтую дату і трэба лічыць пачаткам існавання ушацкай парафіі. Ад 1787 г. дамінікане кіравалі пачатковай 6-класнай школай пры сваім кляштары, а ў канцы XVIII ст. утрымлівалі школы і шпіталі мястэчка.

Яшчэ ў 1758 г. мястэчка Ушачы атрымала магдэбургскае права і герб, на якім была выява святога Лаўрэнція. Менавіта з таго часу і да нашых дзён св. Лаўрэнцій з’яўляецца апекуном Ушачаў.

У 1832 г. расійскія ўлады ліквідавалі кляштар, а касцёл перадалі дыяцэзіяльнаму духавенству. 29 ліпеня 1868 г. на хвалі пераследу пасля студзеньскага паўстання парафія ва Ушачах была ліквідаваная, а касцёл перададзены Праваслаўнай Царкве. На той момант у парафіі налічвалася каля 1400 вернікаў. У гэты ж дзень былі зачыненыя таксама касцёлы ў Чашніках, Кублічах і Палідонічах.

На пачатку ХХ ст. ва Ушачах была адна царква, рыма-каталіцкая капліца і чатыры сінагогі. У 1905 г. у сувязі з абвяшчэннем маніфеста Мікалая ІІ католікам з Ушачаў удалося атрымаць дазвол на вяртанне парафіі. Набажэнствы адбываліся ў драўлянай капліцы на могілках. У 1908 г. быў атрыманы дазвол на будаўніцтва касцёла, але ў хуткім часе недабудаваную святыню зачынілі. Перад рэвалюцыяй 1917 г. у парафіі налічвалася 1600 вернікаў. Пасля рэвалюцыі на працягу некаторага часу ў мястэчка прыязджаў адпраўляць св. Імшу ксёндз з Лепеля.

У 1994 г. дзякуючы вялікім намаганням лепельскага пробашча кс. Мечыслава Янцышына парафія св. Лаўрэнція адрадзілася. У 2001 г., амаль праз два стагоддзі, ва Ушачах быў прызначаны пастаянны пробашч і перададзена пляцоўка з касцёлам, які пачалі аднаўляць. Праводзяцца рэгулярныя заняткі па катэхезе для дзяцей і моладзі, удзяляюцца св. сакрамэнты, арганізавана першае Ружанцовае кола, адбываюцца духоўныя сустрэчы для паглыблення рэлігійных ведаў.

24 кастрычніка 2004 г. біскуп Віцебскай дыяцэзіі Уладзіслаў Блін урачыста асвяціў адбудаваную святыню.

Абноўлена 27.07.2017 16:21
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Дух хоча жыць у нас –
мы пакліканы да вечнага жыцця