Фота Аўдыё Відэа  
be  ru  pl  en  de info@catholic.by
Гэта архіў старой версіі сайта. Новая версія знаходзіцца па адрасе catholic.by
Папа Францішак і Патрыярх Тавадрас ІІ падпісалі сумесную дэкларацыю
Святы Айцец
01.05.2017 09:03

Папа Рымскі Францішак і Патрыярх Копцкай Праваслаўнай Царквы Тавадрас ІІ падпісалі сумесную дэкларацыю аб працягу шляху да поўнай эўхарыстычнай еднасці і адзінства паміж Цэрквамі.

Дэкларацыя была падпісана 28 красавіка на завяршэнне сустрэчы паміж іерархамі ў каірскай рэзідэнцыі Патрыярха.

Бакі абавязаліся ўзаемна прызнаваць дзейнасць удзеленага сакрамэнту хросту, паглыбляць экуменічны дыялог, актыўна выступаць у падтрымку міру паміж народамі і рэлігіямі, змагацца за сацыяльную справядлівасць і сведчыць аб веры ў сучасным свеце.

У дакуменце падкрэсліваецца, што крыніцай адзінства паміж Цэрквамі з’яўляецца поўная еднасць, якая існавала ў першыя стагоддзі хрысціянства і выражалася ў малітве і літургіі, ушанаванні адных і тых жа мучанікаў і святых, а таксама ў развіцці манаства.

У дэкларацыі адзначаецца, што для будавання адзінства паміж Цэрквамі важнае значэнне мае супольная малітва і сведчанне аб фундаментальных хрысціянскіх каштоўнасцях. Папа і Патрыярх падкрэслілі таксама значэнне экуменізму мучанікаў.

«Просім Бога, нашага Айца, весці нас праз часы спосабамі, якія абярэ Святы Дух, да поўнай еднасці ў містычным Целе Хрыста», — адзначылі ў сумеснай дэкларацыі іерархі.

Беларуская рэдакцыя Ватыканскага радыё


 

Пры выкарыстанні матэрыялаў сайта спасылка на Catholic.By абавязкова.