Фота Аўдыё Відэа  
be  ru  pl  en  de info@catholic.by
Гэта архіў старой версіі сайта. Новая версія знаходзіцца па адрасе catholic.by
«Знайдзіце свой запал і служыце людзям»: гурт «Рыбы» прэзентаваў новы альбом
Беларусь - Мінска-Магілёўская архідыяцэзія
29.08.2016 13:09

27 жніўня ў Жодзіне гурт «Рыбы» прэзентаваў свой другі альбом пад назвай «Любі». Пра тое, як прайшла прэзентацыя, распавядае Вольга Качалка:

«На дварэ касцёла Маці Божай Фацімскай у Жодзіне была расстаўлена музычная апаратура, зладжаны дэкарацыі, запальваліся свечы. Не было мітусні ― было чаканне цёплага душэўнага вечара. Збіралася грамада гасцей, якія пакрысе з’язджаліся на канцэрт.

Ужо загадзя гурт "Рыбы" запрашаў усіх на прэзентацыю свайго другога альбома «Любі» 27 жніўня. Я ведала, што паеду, бо ў такі добры час сярод знаёмых і сяброў заўсёды бачу, як Божая любоў разліваецца праз добрыя позіркі, шчырую радасць і абдымкі людзей.

«На глыбіню плыві»

Сонца садзілася за гарызонт, госці займалі месцы на адмыслова падрыхтаваных пакрывалах, укутваліся ў прапанаваныя пледы, пілі гарбату, частаваліся згатаваным печывам. Паўсюль можна было ўбачыць вывешаныя фотаздымкі, на якіх ― усе ўдзельнікі праекту падчас шматлікіх служэнняў, на фэстах, у вязніцах, на канцэртах.

"Рыбы" яшчэ не пачыналі граць, а свята ўжо захапіла нашыя сэрцы.


"Час маліцца", ― пачула я прашаптаныя сярод "рыбак" словы ― гэта значыць, што ўсе ўдзельнікі гурта, як і заўсёды перад выступленнем, адыходзяць убок і ў малітве аддаюць усё сваё служэнне, увесь час Духу Святому.

Канцэрт гурта "Рыбы" ўяўляў сабоё праслаўленне нашага Пана, ушанаванне Яго вялікіх спраў у нашым жыцці. Выйшла, што адбыўся зусім не канцэрт, а супольная малітва. Мы пачулі і новыя песні, і ўлюбёныя хрысціянскія "хіты", быў час для глыбокага засяроджання і час для радасных танцаў і ўзнятых рук.

У перапынках мы пачулі ад удзельнікаў, якім чынам кожны трапіў у праект, што значыць для іх удзел у гурце, а таксама словы падзякі ўсім людзям добрай волі, якія паспрыялі з’яўленню альбома: Ядзі Багдановіч, якая з’яўляецца аўтарам усіх новых песень, айцу Міхаілу Цвячкоўскаму МІС, які для рэпетыцый даў у карыстанне памяшканні касцёла ў Жодзіне, айцу Яну Глінку SVD, які прапанаваў студыю гуказапісу, а таксама ўсім ахвярадаўцам.

Прэзентацыя скончылася, на дварэ сцямнела, а людзі яшчэ доўга не разыходзіліся, дзелячыся ўражаннямі. Я абдумвала словы ўдзельнікаў праекта: знайдзіце свой запал і служыце людзям, праслаўляйце ўсім сваім служэннем нашага Пана Езуса Хрыста... Такім сведчаннем "Рыбы" натхняюць на якасную працу, бо кожны з нас, хрысціян, таксама можа служыць бліжнім сваім талентам, варта толькі быць трывалым і паслядоўным у творчасці. Варта толькі рабіць ― і Бог адорыць плёнам».

Фота Веранікі Скрабатун

Фотарэпартаж
 

Пры выкарыстанні матэрыялаў сайта спасылка на Catholic.By абавязкова.