Фота Аўдыё Відэа  
be  ru  pl  en  de info@catholic.by
Гэта архіў старой версіі сайта. Новая версія знаходзіцца па адрасе catholic.by
Пастырскі ліст біскупа Антонія Дзям’янкі на месяц цвярозасці — жнівень 2016
Іерархі
26.07.2016 11:35

Да святароў, кансэкраваных асобаў і свецкіх вернікаў Пінскай дыяцэзіі

Умілаваныя ў Хрысце Пану браты і сёстры!

У Год Міласэрнасці звяртаюся да вас з заахвочваннем да малітвы аб цвярозасці, а таксама аб паўстрыманні ад алкагольных напояў у месяцы жніўні — часе асаблівага малення аб цвярозасці нашага народа.

Звяртаюся да вас у сувязі з непакоячай сітуацыяй надмернага спажывання алкагольных напояў. У сувязі з павелічэннем колькасці месцаў гандлю алкаголем у свеце назіраецца яго спажыванне часам у вялікіх колькасцях асабліва сярод моладзі. Даходзіць інфармацыя аб розных аферах, звязаных з нелегальнай вытворчасцю і продажам алкагольных вырабаў. Здараюцца выпадкі продажу алкаголю дзецям, непаўналетнім і нецвярозым асобам.

Надужыванне алкаголю, хваробы па прычыне алкагольнай залежнасці і іх наступствы маюць не толькі этычны аспект, але таксама грамадскае вымярэнне. Празмернае ўжыванне алкаголю прыводзіць да псіхічных парушэнняў, росту колькасці злачынстваў, аварый на дарогах, непрысутнасці і няшчасных выпадкаў на працы, а самае горшае — да распаду сем’яў, з-за чаго найбольш пакутуюць дзеці.

Прычыны спажывання алкаголю маюць індывідуальны, грамадскі і эканамічны характар. Яны абумоўлены слабасцю чалавечай натуры, сямейнымі цяжкасцямі, дрэннымі звычаямі. Існуе паўсюдны звычай спалучэння сямейных і сяброўскіх сустрэч з празмерным піццём алкаголю. Неаднойчы чалавека змушаюць піць.

Паводле даных Сусветнай арганізацыі аховы здароўя, за 2011 г. у выніку перадазіроўкі алкаголю ў свеце памерла 2,5 мільёны чалавек, што складае 4% ад колькасці ўсіх смяротных выпадкаў. Гэта больш смерцяў, чым ад СНІДу ці туберкулёзу.

Год Міласэрнасці, які мы перажываем, абавязвае нас да выпраўлення і да выхаду з нашых грахоў і слабасцяў.

Я скіроўваю да ўсіх дыяцэзіян заклік паўстрымацца ад алкаголю на працягу жніўня, а таксама зменшыць яго спажыванне і прапаганду. Асабліва гэта датычыць святкаванняў у коле сям’і з нагоды юбілеяў ці іншых важных датаў. Мы нікому не прычынім шкоды, калі з той ці іншай урачыстасці вернемся дадому цвярозымі і тым самым станем папулярызатарамі культуры цвярозасці.

З боку Касцёла пастаянна прадпрымаюцца душпастырскія захады на карысць цвярозасці, што з’яўляецца істотным аспектам клопату пра дабро кожнай асобы і ўсяго народа. Касцёл усведамляе выключную складанасць і цяжкасць гэтага задання. Таму запрашаем усе зацікаўленыя асяроддзі, грамадскія групы і спецыяльныя ўстановы да сумесных намаганняў дзеля цвярозасці нашага грамадства.

Усіх вернікаў Пінскай дыяцэзіі на месяц цвярозасці з сэрца благаслаўляю.

+ Антоні Дзям’янка
Біскуп Пінскі

Шаноўныя святары няхай абвесцяць вернікам гэты ліст у нядзелю 31 ліпеня на кожнай святой Імшы і размесцяць яго на прыкасцёльнай дошцы аб’яваў на ўвесь месяц жнівень.

 

Пры выкарыстанні матэрыялаў сайта спасылка на Catholic.By абавязкова.

Іерархі

01.07 10:47Біскуп Антоні Дзям’янка ў Будславе: «Не варта рабіць з Марыі “краму” для спаўнення жаданняў»
28.06 12:22Паведамленне біскупа Пінскага Антонія Дзям’янкі з нагоды благаслаўлення вуглавога каменя пад новы касцёл Насвяцейшага Сэрца Езуса ў Брэсце
24.06 20:47Беларуская дэлегацыя прыняла ўдзел у біскупскім пасвячэнні кс. Віталія Крывіцкага SDB
19.06 09:58Фотафакт. Апостальскі Нунцый Габар Пінтэр наведаў парафію ў Асіповічах
16.06 11:43Мітрапаліт Кандрусевіч прыняў удзел у міжнародным форуме на тэму барацьбы з карупцыяй
12.06 12:30Паведамленне біскупа Пінскага Антонія Дзям’янкі з нагоды святкавання 400-годдзя асвячэння касцёла ў Ружанах
12.06 08:55Заклік біскупа Аляксандра Яшэўскага да вернікаў Магілёўскага рэгіёна да ўдзелу ў працэсіі Божага Цела
10.06 00:04Адкрыты ліст Мітрапаліта Тадэвуша Кандрусевіча лаўрэату Нобелеўскай прэміі спадарыні Святлане Алексіевіч
24.05 12:27Мітрапаліт Кандрусевіч прымае ўдзел у пасяджэнні італьянскага епіскапату
16.05 13:52«Уражвае дабрыня мясцовых вернікаў»: Апостальскі Нунцый падсумаваў візіт у Віцебскую дыяцэзію