Фота Аўдыё Відэа  
be  ru  pl  en  de info@catholic.by
Гэта архіў старой версіі сайта. Новая версія знаходзіцца па адрасе catholic.by
Аўторак — трынаццаты звычайны тыдзень
Год І

ПЕРШАЕ ЧЫТАННЕ

Быц 19, 15–29

І спаслаў Пан на Садом і Гамору дождж з серы і агонь

Чытанне кнігі Быцця.

У тыя дні:

Анёлы прыспешвалі Лота, кажучы: Устань, вазьмі жонку тваю і дзвюх дачок тваіх, якія ў цябе, каб не загінуў ты за беззаконні горада. А паколькі ён марудзіў, то мужы тыя, з літасці Пана да яго, узялі за руку яго і жонку, і дзвюх дачок ягоных і павялі яго, і вывелі за горад.

Калі ж вывелі іх вонкі, то адзін з іх сказаў: Ратуй жыццё сваё; не азірайся і нідзе не спыняйся ў гэтай ваколіцы; ратуйся на гары, каб табе не загінуць.

Але Лот сказаў ім: Не, Пане. Вось слуга Твой знайшоў упадабанне ў вачах Тваіх, і павялічыў Ты міласць сваю да мяне, каб уратаваць жыццё маё. Але я не магу ратавацца на гары, каб не застала мяне бяда і я не памёр. Вось блізкі гэты горад, каб уцякаць туды, і ён малы. Я ўратуюся ў ім. Ці ж ён не малы? І будзе захавана жыццё маё.

І сказаў яму: Вось учыню яшчэ і гэта для цябе: не знішчу горада, пра які ты кажаш. Спяшайся, ратуйся там, бо Я нічога не магу ўчыніць, пакуль ты не ўвойдзеш туды. Таму і названы горад гэты: Сэгор. Сонца ўзышло над зямлёю, і Лот увайшоў у Сэгор.

І спаслаў Пан на Садом і Гамору дождж з серы і агонь ад Пана з нябёсаў. І знішчыў гарады гэтыя і ўсю ваколіцу, і ўсіх жыхароў гарадоў гэтых, і расліннасць зямлі. А жонка Лота азірнулася назад і ператварылася ў слуп солі.

Раніцай на світанні ўстаў Абрагам і пайшоў на месца, дзе стаяў перад абліччам Пана. Паглядзеў ён на Садом і Гамору, і на ўсю паверхню зямлі гэтай ваколіцы. І ўбачыў, як дым уздымаецца з зямлі, быццам дым з печы.

Калі ж Бог знішчаў гарады гэтай ваколіцы, успомніў Бог пра Абрагама і вызваліў Лота ад знішчэння, калі руйнаваў гарады, у якіх жыў Лот.

Гэта слова Божае.

аРЭСПАНСАРЫЙНЫ ПСАЛЬМ

Пс 26 (25), 2–3. 9–10. 11–12 (Р.: 3а)

Рэфрэн: Твая міласэрнасць, Пане, перад маімі вачыма.

2. Правер мяне, Пане, і выпрабуй, *
даследуй маё нутро і сэрца.
3. Бо Твая міласэрнасць перад маімі вачыма,*
і я паступаю паводле Тваёй праўды.

Рэфрэн:

9. Не загубі душы маёй з грэшнікамі, *
і жыцця майго з людзьмі крыважэрнымі,
10. у руках якіх зладзейства, *
і правіца якіх напоўнена подкупам.

Рэфрэн:

11. Я ж хаджу ў сваёй беззаганнасці, *
вызвалі мяне і злітуйся нада мною.
12. Нага мая стаіць на роўным месцы, *
на сходах я благаслаўляю Пана.

Рэфрэн:
а

Год ІІ

ПЕРШАЕ ЧЫТАННЕ

Ам 3, 1–8; 4, 11–12

Пан Бог сказаў — хто не будзе прарочыць?

Чытанне кнігі прарока Амоса.

Слухайце слова, якое Пан прамовіў супраць вас, сыны Ізраэля, супраць усяго племені, якое вывеў Я з зямлі егіпецкай, кажучы: Толькі вас прызнаў Я сярод усіх плямёнаў зямлі, таму наведаю вас з судом за ўсе беззаконні вашыя.

Ці ж пойдуць двое разам, калі не дамовяцца паміж сабою? Ці ж рыкае леў у лесе, калі няма перад ім здабычы? Ці ж падае свой голас ільвяня з логава свайго, калі нічога не злавіла? Ці ж трапіць птушка ў пятлю на зямлі, калі сіла няма для яе? Ці ж падымецца з зямлі пятля, калі нічога не трапіла ў яе? Калі трубіць у горадзе рог, — ці не спалохаўся б народ? Ці ж бывае ў горадзе бедства, якое не Пан учыніў бы? Бо Пан Бог нічога не робіць, не адкрыўшы сваёй таямніцы слугам сваім прарокам. Леў пачаў рыкаць – хто не спалохаецца? Пан Бог сказаў — хто не будзе прарочыць?

Я нішчыў вас, як знішчыў Бог Садом і Гамору, і былі вы, нібы галавешка, выхапленая з пажарышча, і ўсё адно вы не вярнуліся да Мяне, — кажа Пан. Таму так зраблю Я з табою, Ізраэль. А паколькі так зраблю з табою, падрыхтуйся да сустрэчы з Богам тваім, Ізраэль.

Гэта слова Божае.

аРЭСПАНСАРЫЙНЫ ПСАЛЬМ

Пс 5, 5–6. 7. 8 (Р.: 9а)

Рэфрэн: Пане, вядзі мяне ў сваёй справядлівасці.

5. Паколькі Ты Бог, які не жадае беззаконня, *
грэшнік не будзе жыць каля Цябе.
6. Несправядлівыя не вытрываюць *
перад Тваімі вачыма.

Рэфрэн:

7. Ты ненавідзіш усіх, хто чыніць беззаконне. *
Загубіш тых, хто кажа хлусню;
чалавек крыважэрны і падступны *
брыдкі для Пана.

Рэфрэн:

8. А я ў вялікай міласэрнасці Тваёй *
увайду ў дом Твой,
пакланюся святыні Тваёй святой *
у боязі перад Табой.

Рэфрэн:

а

СПЕЎ ПЕРАД ЕВАНГЕЛЛЕМ

Пс 130 (129), 5
Акламацыя: Аллелюя, аллелюя, аллелюя.

Спадзяюся на Пана,
давяраю Яго слову.

Акламацыя: Аллелюя, аллелюя, аллелюя.
аЕВАНГЕЛЛЕ
Мц 8, 23–27

Устаўшы, забараніў вятрам і мору, і настала вялікая ціша

+ Чытанне святога Евангелля паводле Мацвея.

У той час:

Калі Езус увайшоў у човен, увайшлі за Ім Ягоныя вучні.

І вось пачалася вялікая бура на моры, так што човен накрывалі хвалі. А Ён спаў.

І, падышоўшы, яны разбудзілі Яго, кажучы: Пане, ратуй, мы гінем. А Ён кажа ім: Чаго вы спалохаліся, малой веры? Тады, устаўшы, забараніў вятрам і мору, і настала вялікая ціша. А людзі дзівіліся і казалі: Хто Ён такі, што і вятры, і мора слухаюцца Яго?

Гэта слова Пана.


Пераклад здзейснены Секцыяй па перакладзе літургічных тэкстаў і афіцыйных дакументаў Касцёла пры ККББ

Адноўлена 17.06.2010 13:45
 

Пры выкарыстанні матэрыялаў сайта спасылка на Catholic.By абавязкова.