У сераду 22 мая на плошчы Святога Пятра ў Ватыкане прайшла традыцыйная агульная аўдыенцыя, падчас якой Папа Францішак асаблівым чынам заклікаў да малітвы за мір, канстатуючы пры гэтым, што свет знаходзіцца цяпер у стане вайны.
Як паведаміла Польская рэдакцыя парталу Vatican News, падчас аўдыенцыі, акрамя прамоўленай катэхезы, Святы Айцец таксама пажадаў усім сабраным суцяшэння ад Духа Святога і настойліва заахвоціў імкнуцца да спынення ўзброеных канфліктаў.
«Памолімся за мір. Нам патрэбны мір. Свет знаходзіцца ў стане вайны», — сказаў Папа. Ён таксама назваў канкрэтныя месцы, дзе ідуць войны.
«Не будзем забывацца пра спакутаваную Украіну, якая так моцна церпіць. Не будзем забывацца пра Палестыну і Ізраіль: няхай гэтая вайна скончыцца. Не будзем забывацца пра Бірму», — сказаў Святы Айцец. Ён прасіў людзей памятаць і пра іншыя краіны, дзе ідуць войны.
«Браты і сёстры, мы павінны маліцца за мір у гэты час сусветнай вайны», — заклікаў Папа Францішак.
