18 кастрычніка, у свята святога Лукі, евангеліста, які, паводле касцёльнай традыцыі, быў лекарам і з’яўляецца нябесным апекуном медыкаў, у катэдральным касцёле Найсвяцейшага Імя Марыі ў Мінску адбудзецца супольная малітва працаўнікоў службы аховы здароўя.
У 18.30 у галоўнай каталіцкай святыні сталіцы распачнецца святая Імша, цэлебрацыю якой узначаліць Мітрапаліт Мінска-Магілёўскі арцыбіскуп Юзаф Станеўскі.
Пасля цэлебрацыі ў катэхетычным класе катэдральнай плябаніі адбудзецца першая сустрэча адмысловага душпастырства працаўнікоў службы аховы здароўя.
Плануецца рэгулярна праводзіць такія сустрэчы ў мінскай катэдры кожны трэці аўторак месяца ў 18.30.
Адказным за правядзенне фармацыйных сустрэч з’яўляецца душпастыр працаўнікоў службы аховы здароўя Мінска-Магілёўскай архідыяцэзіі ксёндз Андрэй Лысы, хрыстусовец.
Арганізатары запрашаюць медыкаў далучыцца да групы душпастырства ў камунікатары Тэлеграм, каб там атрымліваць падрабязную інфармацыю і абменьвацца думкамі.
- Па пытаннях можна звяртацца па тэл.:
+375 (33) 605 41 67 – кс. Андрэй Лысы SChr
