Cвятыя Андрэй Кім Таэгон, святар, і Павел Чон Хасан, паплечнікі, мучанікі | Друк |

Cвятыя Андрэй Кім Таэгон, святар, і Павел Чон Хасан, мучанікіКім Таэгон нарадзіўся 21 жніўня 1821 г. у Карэі ў сям’і хрысціянаў і пры хросце атрымаў імя Андрэй. Нягледзячы на жорсткі пераслед хрысціянскай веры, які лютаваў тады ў Карэі, Андрэй Кім захаваў ёй вернасць і ў 1845 г. прыняў у Шанхаі (Кітай) святарскае пасвячэнне, стаўшы першым каталіцкім святаром карэйскага паходжання. Рызыкуючы жыццём, ён вярнуўся на радзіму, пасля чаго дапамог таксама іншым святарам прабрацца ў Карэю.

Праз год пасля пасвячэння, 16 верасня 1846 г., у Сеуле, Андрэй быў арыштаваны і бязлітасна забіты праз адсячэнне галавы. У гады пераследу хрысціянства ў Карэі загінула шмат іншых хрысціянаў, сярод якіх вядомы сваім адданым апостальскім служэннем свецкі вернік Павел Чон Хасан. Ён прыняў мучаніцкую смерць ва ўзросце 44-х гадоў 22 верасня 1839 г. пасля доўгіх катаванняў, якімі яго спрабавалі прымусіць адрачыся ад «чужой рэлігіі». У 1984 г. Папа Ян Павел ІІ кананізаваў 103 карэйскіх мучанікаў, якія аддалі жыццё за веру. Святога Андрэя Кім Таэгона асаблівым чынам ушаноўваюць у яго на радзіме, перш за ўсё мясцовыя святары.

Успамін: 20 верасня
Адноўлена 24.09.2010 13:08
 
© 2003-2024 Catholic.by