Аб чым прашу?
Мець дар сапраўднага адзінства ў маёй сям’і і супольнасці.

У той час:
²⁰Езус узняў вочы свае да неба і маліўся такімі словамі: Ойча святы, не толькі за іх прашу Я, але і за тых, хто паверыць у Мяне паводле слова іхняга,
²¹каб усе былі адно, як Ты, Ойча, ува Мне, і Я ў Табе, каб і яны былі ў Нас, каб паверыў свет, што Ты паслаў Мяне.
²²І славу, якую Ты даў Мне, Я даў ім, каб былі адно, як і Мы адно.
²³Я ў іх, а Ты ўва Мне. Каб былі з’яднаныя ў адно, каб свет пазнаў, што Ты паслаў Мяне і палюбіў іх, як палюбіў Мяне.
²⁴Ойча, хачу, каб тыя, каго Ты даў Мне, былі са Мною там, дзе Я, каб бачылі славу Маю, якую Ты даў Мне, бо палюбіў Мяне перад заснаваннем свету.
²⁵Ойча справядлівы, свет Цябе не пазнаў, а Я пазнаў Цябе, і гэтыя пазналі, што Ты паслаў Мяне.
²⁶Я абвясціў ім Тваё імя, і абвяшчаць буду, каб любоў, якою Ты палюбіў Мяне, у іх была, і Я ў іх.

• Уяўлю сабе Езуса, які «ўзняў вочы свае да неба» і моліцца да свайго Айца. Гэта малітва за хвіліну да жахлівай мукі. Буду сузіраць Езуса, які ў тую гадзіну так горача і ўсхвалявана моліцца за мяне, моліцца аб адзінстве ў маёй сям’і і супольнасці. Ці ўсведамляю сабе штодзённа, што Езус моліцца за ўсіх нас і за кожнага паасобку?
  
• Звярну ўвагу, што Езус некалькі разоў паўтарае ў малітве просьбу аб дары адзінства (вершы 21–23). Што магу сказаць аб адзінстве ў маёй сям’і і супольнасці? Што магу сказаць аб маім унутраным адзінстве з Богам? Што гэтаму адзінству больш за ўсё перашкаджае, разбівае яго?
  
• Вызнаю Езусу мае грахі супраць адзінства. Аддам Яму з поўным даверам усе «куточкі» свайго сэрца, якія аддаляюць мяне ад Бога і нішчаць маё адзінства з іншымі. Буду моцна прасіць аб іх аздараўленні.
  
• Езус кажа Айцу, што адзінства паміж людзьмі з’яўляецца сведчаннем веры і любові перад светам (вершы 21, 23). Якое сведчанне адзінства дае асяроддзю мая сем’я і супольнасць? Што ў нашых адносінах станоўчае, а што паказвае кепскі прыклад іншым?
  
• Езус моліцца за мяне да Айца аб вечным прабыванні з Ім. Усвядомлю праз гэтыя словы, як моцна Езус жадае, каб я прабываў з Ім вечна. Як часта думаю пра вечнасць? Ці малюся аб жыцці вечным для сябе і для супольнасці, у якой жыву?
  
• Папрашу Езуса, каб Яго ўзаемная любоў з Айцом прасякнула таксама маё сэрца, маю сям’ю і супольнасць, у якой жыву. Буду паўтараць са шчырым і гарачым сэрцам: «Езу, захавай нас у адзінстве!».