Аб чым прашу?
Быць уражлівым на Божыя натхненні і шчырым у адказе на іх.

У той час:
²⁸  Езус узяў з сабою Пятра, Яна і Якуба і ўзыйшоў на гару памаліцца.
²⁹  І калі Ён маліўся, выгляд твару Ягонага перамяніўся, і вопратка Ягоная стала бліскуча-белай.
³⁰  І вось два мужы размаўлялі з Ім, а былі гэта Майсей і Ілля.
³¹ Яны з’явіліся ў славе і казалі пра Ягоны адыход, які Ён павінен здзейсніць у Ерузалеме.
³² Пётр і тыя, хто быў разам з ім, былі змораныя сном. Калі ж абудзіліся, убачылі славу Яго і двух мужоў, якія стаялі разам з Ім.
³³ А калі яны адыходзілі адтуль, Пётр сказаў Езусу: Настаўнік, добра нам тут быць. Паставім тры шатры: адзін для Цябе, адзін для Майсея і адзін для Іллі. Не ведаў ён, што казаў.
³⁴ Калі гаварыў гэта, з’явілася воблака і агарнула іх. І спалохаліся яны, калі ўвайшлі ў воблака.
³⁵ А з воблака пачуўся голас, які казаў: Гэта Сын Мой выбраны, Яго слухайце.
³⁶ І калі гучаў гэты голас, Езус апынуўся адзін.
І маўчалі яны, і ў тыя дні нікому нічога не казалі пра тое, што бачылі.

• Далучуся да Апосталаў, якія ідуць з Езусам на гару. Папрашу аб унутранным перажыванні блізкасці Езуса. Буду размаўляць з Ім пра маю штодзённасць, пра мае клопаты.
  
• Гэта Езус праяўляе ініцыятыву (верш 28). Забірае Апосталаў на гару, каб адарваць іх ад штодзённасці, стомленасці і падрыхтаваць на час мукі. Заўважу клопат і ўражлівасць Езуса да слабасцяў вучняў.
• Ці клапачуся аб паглыбленні шчырай сувязі з Езусам? Ці заўважаю натхненні, праз якія Езус запрашае мяне да асабістай малітвы? Якія натхненні я атрымаў у апошні час? Чаго яны датычылі? Як я адказваў на іх на працягу дня?
  
• Езус вядзе Апосталаў да містычнага перажывання, каб маглі ўбачыць Яго боскасць і прыгажосць (вершы 29–32). Заўважу захапленне і шчасце Апосталаў (верш 33). Разам з імі буду адараваць Езуса, які прагне наталіць мяне сваёй любоўю і прыгажосцю сваёй боскасці і чалавецтва.
  
• Вярнуся ў думках да найглыбей перажытых сустрэч з Езусам. Дзе гэта было? Калі? У якіх абставінах? Успомню перад Езусам духоўныя прагненні, пазітыўныя пачуцці. Падзякую за іх. Ён даў мне іх, каб былі для мяне ўмацаваннем і пацехай ў самыя цяжкія хвіліны.
  
• Глыбокая сувязь з Езусам можа перамяніць усякую штодзённасць. Падчас малітвы аднаўлю маё жаданне прабываць у блізкай сувязі з Езусам. Папрашу Яго аб штодзённай вернасці гэтаму жаданню. Сярод маіх заняткаў буду паўтараць: «Езу, Цябе прагну, Цябе шукаю».