Фота Аўдыё Відэа  
be  ru  pl  en  de info@catholic.by
Гэта архіў старой версіі сайта. Новая версія знаходзіцца па адрасе catholic.by
Аўторак — дваццаць чацвёрты звычайны тыдзень
Год І

ПЕРШАЕ ЧЫТАННЕ

1 Цім 3, 1–13

Біскуп павінен быць бездакорным; таксама і дыяканы павінны захоўваць таямніцу веры ў чыстым сумленні

Чытанне Першага паслання святога апостала Паўла да Цімафея.

Умілаваны:

Гэта слова годнае веры: калі хто прагне біскупства, ён жадае добрай справы. Таму біскуп павінен быць бездакорным, мужам адной жонкі, цвярозым, разважлівым, прыстойным, гасцінным, здольным навучаць, не схільным да п’янства, не сварлівым, але спагадлівым, міралюбным і не прагным да грошай. Ён павінен добра кіраваць уласным домам і мець паслухмяных дзяцей з усёю годнасцю. Бо, калі хто не ўмее кіраваць уласным домам, як жа зможа клапаціцца аб Касцёле Божым?

Ён не павінен быць нэафітам, каб не заганарыўся і не патрапіў пад д’ябальскае асуджэнне. Ён павінен таксама мець добрае сведчанне ад тых, хто звонку, каб не патрапіць у пагарду і пастку д’ябла.

Таксама і дыяканы павінны быць годнымі, не падманлівымі ў мове, не злоўжываць віном і не карыслівымі, павінны захоўваць таямніцу веры ў чыстым сумленні. І такіх трэба спачатку выпрабоўваць, а потым няхай служаць, калі акажуцца бездакорнымі. Жанчыны таксама няхай будуць годнымі, не пляткаркамі, цвярозымі і вернымі ва ўсім.

Няхай дыякан будзе мужам адной жонкі, няхай добра кіруе дзецьмі і ўласным домам. Бо тыя, хто добра служыў дыяканам, здабываюць сабе годнае становішча і вялікую рашучасць веры ў Езуса Хрыста.

Гэта слова Божае.

аРЭСПАНСАРЫЙНЫ ПСАЛЬМ

Пс 101 (100), 1–2аb. 2cd–3аb. 5. 6. (Р.: пар. 2с)

Рэфрэн: Стану перад Панам  з чыстым сэрцам.

1. Я буду апяваць міласэрнасць і правасуддзе; *
буду спяваць Табе, Пане.
2. Буду разважаць над беззаганным шляхам, *
калі ж Ты прыйдзеш да мяне?

Рэфрэн:

Буду паступаць у бязвіннасці свайго сэрца *
пасярод свайго дому.
3. Не пакладу перад сваімі вачыма нікчэмнай рэчы; *
тых, хто паступае злачынна, я ненавіджу.

Рэфрэн:

5. Знішчу таго, *
хто патаемна абгаворвае свайго бліжняга;
ганарлівага вачыма і пыхлівага сэрцам *
не буду цярпець.

Рэфрэн:

6. Вочы мае скіраваны на верных зямлі, *
каб яны заставаліся са мною;
хто ходзіць шляхам беззаганным, *
той будзе мне служыць.

Рэфрэн:
а

Год ІІ

ПЕРШАЕ ЧЫТАННЕ

1 Кар 12, 12–14. 27–31а

Вы ж — цела Хрыстовае, а паасобку — часткі

Чытанне Першага паслання святога апостала Паўла да Карынцянаў.

Браты:

Як цела адно, але мае многа частак, якія, хоць іх шмат, складаюць адно цела, так і Хрыстус.

Бо ўсе мы адным Духам ахрышчаныя ў адно цела, юдэі ці грэкі, нявольнікі ці свабодныя, і ўсе напоены адным Духам.

Цела — гэта не адна частка, але шмат.

Вы ж — цела Хрыстовае, а паасобку — часткі.

Адных Бог паставiў у Касцёле найперш Апосталамi, другіх — прарокамi, трэцiх — настаўнікамі, потым даў моц, потым — дары аздараўлення, дапамогі, кіравання, розныя мовы. Цi ўсе Апосталы? Цi ўсе прарокi? Цi ўсе настаўнікі? Цi ўсе цудатворцы? Цi ўсе маюць дар аздараўлення? Цi ўсе гавораць мовамi? Цi ўсе тлумачаць?

Дбайце пра большыя дары.

Гэта слова Божае.

аРЭСПАНСАРЫЙНЫ ПСАЛЬМ

Пс 100 (99), 2. 3. 4. 5 (Р.: 3c)

Рэфрэн: Мы Яго народ і авечкі Ягонай паствы.

2. Усклікай Пану, уся зямля, *
з радасцю служыце Пану.
Станьце перад Яго абліччам *
з радасным спевам.

Рэфрэн:

3. Ведайце, што Пан ёсць Богам, *
Ён стварыў нас, і мы Ягоныя.
Мы Яго народ *
і авечкі Ягонай паствы.

Рэфрэн:

4. Уваходзьце ў брамы Яго з падзякаю, †
на дзядзінцы Ягоныя з пахвалою, *
праслаўляйце і благаслаўляйце Яго імя.

Рэфрэн:

5. Бо Пан ёсць добры, *
навекі Ягоная міласэрнасць,
і вернасць Яго *
з пакалення ў пакаленне.

Рэфрэн:

а

СПЕЎ ПЕРАД ЕВАНГЕЛЛЕМ


Акламацыя: Аллелюя, аллелюя, аллелюя.
Лк 7, 16
Вялікі прарок паўстаў сярод нас,
і Бог наведаў свой народ.

Акламацыя: Аллелюя, аллелюя, аллелюя.
аЕВАНГЕЛЛЕ
Лк 7, 11–17

Хлопча, кажу табе, устань

+ Чытанне святога Евангелля паводле Лукі.

У той час:

Езус пайшоў у горад, які называўся Наін, і з Ім ішлі многія вучні Ягоныя і вялікі натоўп. Калі ж Ён наблізіўся да гарадской брамы, выносілі з яе памерлага, адзінага сына ў маці, якая была ўдавою. І шмат людзей з горада ішло разам з ёю. Убачыўшы яе, Пан злітаваўся над ёю і сказаў: Не плач.

І падышоўшы, дакрануўся да насілак. Тыя, хто нёс, спыніліся. І сказаў: Хлопча, кажу табе, устань.

Мёртвы сеў і пачаў гаварыць. І Езус аддаў яго маці ягонай. Усіх жа ахапіў страх, і славілі Бога, кажучы: Вялікі прарок паўстаў сярод нас, і Бог наведаў свой народ.

І разышлася гэтая навіна пра Яго па ўсёй Юдэі і па ўсёй ваколіцы.

Гэта слова Пана.


Пераклад здзейснены Секцыяй па перакладзе літургічных тэкстаў і афіцыйных дакументаў Касцёла пры ККББ

Адноўлена 31.08.2010 12:26
 

Пры выкарыстанні матэрыялаў сайта спасылка на Catholic.By абавязкова.