Фота Аўдыё Відэа  
be  ru  pl  en  de info@catholic.by
Гэта архіў старой версіі сайта. Новая версія знаходзіцца па адрасе catholic.by
Чацвер — дзеcяты звычайны тыдзень
Год І

ПЕРШАЕ ЧЫТАННЕ

2 Кар 3, 15 — 4, 1. 3-6

Бог асвятліў нашыя сэрцы, каб даць святло пазнання славы Божай

Чытанне Другога паслання святога апостала Паўла да Карынцянаў.

Браты:

Ажно да сённяшняга дня, калі чытаюць Майсея, покрыва ляжыць на сэрцы сыноў Ізраэля. Калі ж нехта звяртаецца да Пана, покрыва здымаецца.

Пан ёсць Духам, а дзе Дух Пана, там свабода. А мы ўсе з адкрытым абліччам углядаемся, нібы ў люстра, у славу Пана і перамяняемся ў той самы вобраз ад славы ў славу, так як праз Дух Пана.

Таму, маючы з міласэрнасці Божай такое служэнне, мы не губляем адвагі. Калі ж і заслонена Дабравесце нашае, то заслонена для тых, хто гіне, для няверуючых, якім бог веку гэтага зацьміў розум, каб ім не ззяла святло Дабравесця славы Хрыста, які ёсць вобразам Бога.

Бо мы не сябе абвяшчаем, але Хрыста Езуса як Пана, а нас саміх — як слугаў вашых дзеля Езуса. Таму што Бог, які загадаў святлу заззяць з цемры, асвятліў нашыя сэрцы, каб даць святло пазнання славы Божай у абліччы Езуса Хрыста.

Гэта слова Божае.

аРЭСПАНСАРЫЙНЫ ПСАЛЬМ

Пс 85 (84), 9аb–10. 11–12. 13–14 (Р.: пар. 10c)

Рэфрэн: Божая слава паселіцца на нашай зямлі.

9.   Паслухаю, што гаворыць Пан Бог. *
Ён спакой абвяшчае народу і святым сваім.
10. Сапраўды, Яго збаўленне блізкае †
для тых, хто баіцца Яго, *
і слава Божая будзе жыць на нашай зямлі.

Рэфрэн:

11. Міласэрнасць і вернасць сустрэнуцца разам, *
справядлівасць і спакой пацалуюцца.
12. Вернасць вырасце з зямлі, *
а справядлівасць будзе пазіраць з нябёсаў.

Рэфрэн:

13. Пан адорыць нас шчасцем, *
а зямля наша дасць свой плён.
14. Справядлівасць пойдзе перад Ім *
і паставіць на шлях крокі свае.

Рэфрэн:
а

Год ІІ

ПЕРШАЕ ЧЫТАННЕ

1 Вал 18, 41–46

Памаліўся Ілля, і неба дало дождж

Чытанне Першай кнігі Валадарстваў.

У тыя дні:

Ілля сказаў Ахабу: Ідзі, еш і пі, бо чуваць шум вялікага дажджу. Пайшоў Ахаб есці і піць, а Ілля падняўся на вяршыню Кармэля, нахіліўся да зямлі, схаваў твар свой паміж каленяў і сказаў свайму слузе: Ідзі і паглядзі ў бок мора. Той пайшоў, паглядзеў і сказаў: Нічога няма. Ілля зноў сказаў яму: Вяртайся сем разоў. На сёмы раз слуга сказаў: Вось маленькае воблака з чалавечую далонь узнімаецца з мора. Ілля сказаў: Ідзі, скажы Ахабу: запрагай і едзь, каб не застаў цябе дождж.

Неўзабаве неба пацямнела ад хмараў і ад ветру, і пайшоў вялікі дождж. Ахаб сеў у калясніцу і паехаў у Ізрээль. А рука Пана была на Іллі. Ён падперазаў свае бёдры і бег перад Ахабам аж да самага Ізрээля.

Гэта слова Божае.

аРЭСПАНСАРЫЙНЫ ПСАЛЬМ

Пс 65 (64), 10аbcd. 10e–11. 12–13  (Р.: 2а)

Рэфрэн: Табе, Божа, належыць хвала на Сіёне.

10. Ты наведваеш зямлю і насычаеш вільгаццю, *
шчодра яе ўзбагачаеш.
Божы паток напоўнены вадою. *
Ты вырошчваеш збожжа.

Рэфрэн:

Бо так падрыхтаваў яе.
11. Напаіў яе барозны, выраўнаў скібы, *
размякчыў яе дажджамі,
благаславіў яе расліннасць.

Рэфрэн:

12. Ты год вянчаеш ласкавасцю сваёй, *
сцежкі Твае струменяць тукам.
13. Струменяць на пашы ў пустыні, *
а ўзгоркі падпяразваюцца радасцю.

Рэфрэн:

а

СПЕЎ ПЕРАД ЕВАНГЕЛЛЕМ

Ян 13, 34
Акламацыя: Аллелюя, аллелюя, аллелюя.

Новую запаведзь даю вам, каб вы любілі адзін аднаго,
як Я палюбіў вас.

Акламацыя: Аллелюя, аллелюя, аллелюя.
аЕВАНГЕЛЛЕ
Мц 5, 20–26

Кожны, хто гневаецца на брата свайго, падпадае пад суд

+ Чытанне святога Евангелля паводле Мацвея.

У той час:

Езус сказаў сваім вучням: Калі справядлівасць вашая не пераўзыдзе справядлівасці кніжнікаў і фарысеяў, то вы не ўвойдзеце ў Валадарства Нябеснае.

Вы чулі, што было сказана продкам: Не забівай; а хто заб’е, падпадае пад суд. А Я кажу вам, што кожны, хто гневаецца на брата свайго, падпадае пад суд. Хто ж скажа брату свайму «рака», падпадае пад Высокую раду, а хто скажа «неразумны», падпадае пад геену вогненную.

Таму, калі ты прынясеш дар свой да ахвярніка і ўспомніш там, што брат твой мае нешта супраць цябе, пакінь там дар свой перад ахвярнікам і ідзі спачатку памірыся з братам сваім, і тады прыйдзі і прынясі дар свой.

Мірыся з праціўнікам тваім хутка, пакуль ты з ім яшчэ ў дарозе, каб праціўнік не аддаў цябе суддзі, а суддзя не аддаў цябе слузе, і не ўкінулі цябе ў вязніцу. Сапраўды кажу табе: не выйдзеш адтуль, пакуль не аддасі апошні грош.

Гэта слова Пана.


Пераклад здзейснены Секцыяй па перакладзе літургічных тэкстаў і афіцыйных дакументаў Касцёла пры ККББ

Адноўлена 07.06.2010 15:36
 

Пры выкарыстанні матэрыялаў сайта спасылка на Catholic.By абавязкова.