Фота Аўдыё Відэа  
be  ru  pl  en  de info@catholic.by
Прывітальнае слова біскупа Аляксандра Кашкевіча на Нацыянальным эўхарыстычным кангрэсе

24 мая 2016 г.

Эмінэнцыя, найдастойнейшы кардынал, спецыяльны пасланнік Святога Айца на Нацыянальны эўхарыстычны кангрэс у Гродне,
Эксцэленцыі, шаноўныя арцыбіскупы і біскупы,
Шаноўныя Генеральныя настаяцелі і правіцыялы манаскіх супольнасцяў, інстытутаў кансэкраванага жыцця і таварыстваў апостальскага жыцця,
Шаноўныя браты святары, pleno titulo ў пасадах і годнасцях,
Шаноўныя айцы і браты законныя ў харызматах сваіх заснавальнікаў,
Шаноўныя сёстры законныя,
Дарагія дыяканы і семінарысты,
Умілаваныя ў Хрысце Пану браты і сёстры, дарагія госці, якія прыбылі на Нацыянальны эўхарыстычны кангрэс, сябры і прыхільнікі нашага гродзенскага Касцёла, улюбёныя дыяцэзіяне!

Вельмі сардэчна вітаю ўсіх вас, прысутных тут, на юбілейных урачыстасцях 25-годдзя заснавання Гродзенскай дыяцэзіі. Яна была паклікана да існавання 13 красавіка 1991 года Святым Айцом Янам Паўлам ІІ у межах арганізацыі касцёльных структур у Беларусі. Такім чынам быў фармальна ўтвораны наш партыкулярны Касцёл, будучы часткай адзінага, святога, паўсюднага і апостальскага Хрыстовага Касцёла.

Пакліканне да існавання нашай дыяцэзіі было адказам Наступніка святога Пятра на новыя выклікі і магчымасці, звязаныя з працэсам грамадскіх і палітычных зменаў на пачатку 90-х гадоў. Яно стала адным са знакаў, якія звеставалі адраджэнне рэлігійнага жыцця на Гродзеншчыне, якое мы часта называем “вясной Касцёла”.

З вялікай пакорай і ўдзячнасцю мы становімся перад Богам, які ў сваім Провідзе кіруе лёсамі Хрыстовага Касцёла на нашых землях. Жадаем дзякаваць Яму за ўсё, чаго ўдалося дасягнуць на працягу апошніх 25 гадоў. Дзякуем за святароў, якія з вялікай адданасцю спаўняюць пастырскае служэнне сярод вернікаў. Дзякуем за Вышэйшую духоўную семінарыю, якая забяспечыла наш гродзенскі Касцёл новымі працаўнікамі на жніве Панскім. Дзякуем за служэнне шматлікіх манаскіх супольнасцяў, мужчынскіх і жаночых, якія з вялікім самапрысвячэннем абвяшчаюць Евангелле словам і ўчынкам, рэалізуючы свае харызматы. Дзякуем за свецкіх католікаў, якія, спаўняючы свае адпаведныя пакліканні, даюць прыгожае сведчанне веры і прыналежнасці да Касцёла.

Дзякуем таксама за адраджэнне Касцёла ў вымярэнні матэрыяльным: за святыні, якія ў мінулым былі забраны ў вернікаў і якія ўдалося вярнуць і надаць ім годны выгляд; а таксама за новыя касцёлы і капліцы, узведзеныя дзякуючы дапамозе дабрадзеяў і ахвярнасці вернага народу.

Адзначаючы сярэбраны юбілей нашай дыяцэзіі, жадаем асаблівым чынам дзякаваць Пану Богу за людзей старэйшага пакалення, духоўных і свецкіх, якія ў найцяжэйшыя часы не толькі захавалі вернасць Хрысту і Касцёлу, але і здолелі перадаць хрысціянскія каштоўнасці наступным пакаленням. Менавіта на гэтым трывалым фундаменце веры нашых папярэднікаў мы будуем сённяшні дзень і будучыню гродзенскага Касцёла.

Дзякуем сёння таксама за іншыя лакальныя Касцёлы, за мужчынскія і жаночыя манаскія супольнасці, якія рознымі спосабамі паспяшаліся з дапамогай маладому гродзенскаму Касцёлу і якія і далей нас падтрымліваюць у справе адраджэння рэлігійнага жыцця. Дзякуем за ўсіх дабрадзеяў і ахвярадаўцаў, за розныя арганізацыі і за прыватных асобаў, якія ў духу хрысціянскай салідарнасці і адказнасці за Касцёл сведчаць нам сваю зычлівую дапамогу.

Вельмі красамоўным знакам з’яўляецца тое, што мы адзначаем юбілей 25-годдзя Гродзенскай дыяцэзіі ў Год Міласэрнасці. Прачытаем найноўшую гісторыю нашага лакальнага Касцёла як вялікі дар Езуса Міласэрнага для свайго народу, які, нягледзячы на цяжкі і балючы досвед мінулага, здолеў захаваць вернасць Крыжу і Евангеллю. Таму будзем глядзець у будучыню з даверам і даручым наш гродзенскі Касцёл Езусу Хрысту, які ў сакрамэнце Эўхарыстыі прысутны сярод нас ажно да сканчэння свету. Няхай Ён і далей аказвае нам сваю міласэрнасць, адорвае шчодрасцю сваіх ласкаў і вядзе да паўнаты Божага Валадарства.

 

Пры выкарыстанні матэрыялаў сайта спасылка на Catholic.By абавязкова.

Выступленні

23.12 16:38Пастырскае пасланне арцыбіскупа Тадэвуша Кандрусевіча на Божае Нараджэнне 2016
23.12 11:36Адкрыты ліст Мітрапаліта Кандрусевіча міністру аховы здароўя РБ Васілю Жарко
18.12 16:24Прамова Апостальскага Нунцыя арцыбіскупа Габара Пінтэра падчас адвэнтавага чування моладзі ў Мінску
13.10 17:25Даклад а. Паўла Федаровіча MIC пра заснавальніка супольнасці марыянаў святога Станіслава Папчынскага
10.10 15:00Прывітальнае слова Мітрапаліта Кандрусевіча на адкрыццё III Міжнароднай сустрэчы партнёраў «Карытас» Беларусі
08.10 21:12Слова арцыбіскупа Тадэвуша Кандрусевіча падчас пленарнага пасяджэння Рады Біскупскіх Канферэнцый Еўропы ў Манака пасля зацвярджэння г. Мінска месцам правядзення Пленарнага пасяджэння ў 2017 г.
29.09 14:32Выступленне Мітрапаліта Кандрусевіча на адкрыцці выстаўкі «Свет нябесны на зямлі. Сакральнае мастацтва Беларусі XVII-XXI стагоддзяў» у Мінску
26.08 14:54Прывітальнае слова Мітрапаліта Тадэвуша Кандрусевіча на адкрыцці навукова-практычнай канферэнцыі «Беларусь, Нясвіжскі край і Эдвард Вайніловіч»
29.07 21:33Катэхеза Мітрапаліта Тадэвуша Кандрусевіча падчас XXXI Сусветных дзён моладзі
23.06 17:49Прамова арцыбіскупа Тадэвуша Кандрусевіча на V Усебеларускім народным сходзе