Фота Аўдыё Відэа  
be  ru  pl  en  de info@catholic.by
Гэта архіў старой версіі сайта. Новая версія знаходзіцца па адрасе catholic.by
Дзеля ролі ў фільме пра езуітаў акцёр рыхтаваўся на ігнацыянскіх рэкалекцыях
19.12.2016 10:01

Ігнацыянскія рэкалекцыі, у якіх узяў удзел амерыканскі акцёр Эндру Гарфілд у межах падрыхтоўкі да здымак фільму «Цішыня», напоўнілі яго «вялікім прагненнем пашыраць вучэнне Хрыста», якое акцёр «пачаў любіць па-сапраўднаму».

Эндру Гарфілд нарадзіўся і вырас у яўрэйскай сям’і, аднак атрымаў свецкае выхаванне. Ён вядомы гледачам па галоўнай ролі ў фільме «Новы чалавек-павук», а таксама «Кіруючыся сумленнем». Акцёр распавёў пра духоўны ўплыў падрыхтоўкі да ролі місіянера.

«Ён паказаў мне духоўны накірунак, так нібы я сапраўды адбываў фармацыю манаха-езуіта, — патлумачыў Гарфілд, распавядаючы пра а. Джэймса Марціна, кансультанта падчас стварэння стужкі. — Гэта стала для мяне вельмі асабістым падарожжам, падвойным падарожжам: я і Радрыгес вандравалі разам, і я дазволіў падзеям стужкі паўплываць на сябе праз маладога, амбіцыйнага, разумнага, красамоўнага, вучонага езуіта, які хоча зрабіць свой расповед на лініі фронту бітвы за хрысціянства».



Айцец Джэймс Марцін суправаджаў акцёра ў духоўных рэкалекцыях св. Ігнацыя Лаёлы. «Гэта амаль што як праграма 12 крокаў, — кажа Гарфілд пра багатую духоўную практыку. — Сапраўды, гэта аснова для багатых праграм з 12 крокаў: поўная форма медытацыі і малітвы праз уяўленне жыцця Хрыста — аповед праз аповед, Евангелле за Евангеллем».
 
Акцёр распавёў, што з таго часу, як пачаліся здымкі, ён «быў напоўнены ўсёю гэтаю інфармацыяй і гэтым вялікім жаданнем распаўсюджваць вучэнне Хрыста, якое сапраўды пачаў любіць».

Як паведамлялася, рэжысёр Марцін Скарсэза зняў фільм пра езуітаў, якія вырушылі на місіі ў Японію. У ім ідзе гаворка пра тое, як у XVII ст. двое партугальскіх святароў-езуітаў вырушылі да Японіі, каб прапаведаваць там Евангелле. Па дарозе яны сустрэліся з жорсткім пераследам.

Прэм’ера фільма «Цішыня» пройдзе ў сусветных кінатэатрах 23 снежня.

Паводле CREDO (IL)

 

Пры выкарыстанні матэрыялаў сайта спасылка на Catholic.By абавязкова.