У Грузінскай Праваслаўнай Царкве каментуюць візіт Святога Айца ў Грузію |
30.09.2016 13:39 |
Візіт Папы Францішка ў Грузію, які распачаўся 30 верасня і працягнецца да 1 кастрычніка, а таксама сустрэча Пантыфіка з главой Грузінскай Праваслаўнай Царквы Патрыярхам Іліёй ІІ стане сведчаннем таго, што адрозненні паміж рознымі плынямі хрысціянства не павінны быць прычынай для разладу. Пра гэта заявіў у інтэрв’ю Ватыканскаму радыё прадстаўнік прэс-службы Патрыярхіі Грузіі іераманах Міхаіл Баткавелі. Грузінская Царква, як заявіў прадстаўнік прэс-службы, лічыць непрымальным пратэст з боку пэўных груп адносна візіту ў Тбілісі Святога Айца. Прычынай для падобнай заявы стала акцыя пратэсту грамадскай арганізацыі «Саюз праваслаўных бацькоў», сярод якіх былі і святары, ля будынка пасольства Ватыкана ў Тбілісі. Іераманах Міхаіл Баткавелі выказаў меркаванне, што візіт Пантыфіка ў Грузію «стане крокам у будучыню» ў каталіцка-праваслаўных адносінах. Падчас двухдзённага візіту Папы Францішка ў Грузію таксама запланаваны сустрэчы з прэзідэнтам краіны, прадстаўнікамі ўлады і дыпкорпусаў, а таксама мясцовых асіра-халдэйскай і каталіцкай супольнасцяў. Акрамя гэтага, Святы Айцец узначаліць літургію на стадыёне імя Міхаіла Месхі ў Тбілісі. |