Трагічнай з’яўляецца таксама сітуацыя людзей, якія за год да пачатку тэрору «Ісламскай дзяржавы» ўцяклі з Масула і даліны Нінівы на тэрыторыю курдаў.

«Для іх адсутнасць якой бы ні было надзеі з’яўляецца больш адчувальнай, чым адсутнасць ежы ці медыцынскай дапамогі, — перадае словы святара са спасылкай на агенцтва SIR Каталіцкае агенцтва навін Польшчы. — У Іраку для нас няма надзеі».

У мястэчку Аткава каля Эрбіля кс. Аль-Базі апякуецца двума лагерамі хрысціянскіх бежанцаў.

«Людзі баяцца, што сённяшняя сітуацыя — гэта толькі пачатак, што будзе яшчэ горш. Мае людзі занепакоеныя тым, што ж будзе пасля “Ісламскай дзяржавы”», — сказаў святар, дадаўшы, што існуе сур’ёзная небяспека таго, што «наступнае пакаленне “Ісламскай дзяржавы” будзе яшчэ горшым».

Каталіцкі святар з Ірака, які ў канцы жніўня быў запрошаны ў Італію рухам «Камунія і вызваленне сяброўства народаў», параўнаў «Ісламскую дзяржаву» з «мышанём, якое за кароткі час вырасла ў цмока». 

 

Святар дадаў, што «Ісламская дзяржава» — гэта тэрарыстычная арганізацыя, якая стварыла найлепшыя ўмовы для развіцця канфліктаў на Блізкім Усходзе паміж сунітамі і шыітамі.

 

Атакі на хрысціян кс. Аль-Базі адчуў на ўласным прыкладзе. У мінулым годзе ў яго стралялі, а побач з касцёлам, у якім ён цэлебраваў Імшу, выбухнула бомба. У 2006 годзе яго выкралі і катавалі на працягу дзевяці дзён.