Фота Аўдыё Відэа  
be  ru  pl  en  de info@catholic.by
Гэта архіў старой версіі сайта. Новая версія знаходзіцца па адрасе catholic.by
«Caritas»: колькасць бедных у Еўропе не змяншаецца
26.02.2015 15:28

Колькасць беспрацоўных і бедных у Еўропе не памяншаецца: такую выснову можна зрабіць з трэцяга дакладу еўрапейскага аддзялення «Caritas» пра наступствы эканамічнага крызісу ў краінах Еўропы.

Пра гэта паведамляе беларуская рэдакцыя Ватыканскага радыё.

Паўночная Еўропа толькі збольшага адчула на сабе наступствы крызісу, чаго нельга сказаць пра міжземнаморскія краіны. У Італіі беспрацоўе моладзі ва ўзросце ад 15 да 24 гадоў дасягнула 40 працэнтаў.

Рэкордная колькасць маладых італьянцаў — 26 працэнтаў — не працуе, не вучыцца і не ўдзельнічае ні ў якой дзейнасці. Гэта ў два разы больш, чым працэнт такіх асобаў па ўсёй Еўропе. Акрамя таго, у дакладзе адзначаецца рост нестабільнасць працоўных месцаў.

Дзяржаўная палітыка жорсткай эканоміі, якая праводзіцца Еўрасаюзам, адбілася на сацыяльным жыцці: больш за 122 млн. чалавек рызыкуюць быць выцесненымі з грамадства ў Італіі, Іспаніі, Партугаліі, Грэцыі, на Кіпры, у Румыніі і Ірландыі.

«Еўрапейская палітыка, якая праводзіцца нацыянальнымі ўрадамі па ўказанні Бруселя і Страсбурга, накіравана на вызваленне ад адказнасці, у сілу значных скарачэнняў укладаў у сферу сацыяльных паслуг і аховы здароўя», — растлумачыў Вальтэр Нані, кіраўнік Аддзела даследаванняў італьянскага аддзялення «Caritas».


Меры, якія зыходзяць ад Еўрасаюза, адбіліся на самых слабых пластах еўрапейскага насельніцтва. У Еўропе расце няроўнасць, а сацыяльная абарона ўнутры асобных дзяржаў неэфектыўная і аслабленая, пры гэтым назіраецца разрыў паміж эканамічнай палітыкай і дэмакратыяй, адзначыў сакратар еўрапейскага аддзялення «Caritas» Хорхе Маер.

Даклад «Caritas» сугучны з тым, на што пастаянна звяртае ўвагу Папа Францішак, які неаднойчы казаў пра сацыяльныя праблемы Еўропы і асабліва пра беспрацоўе сярод моладзі. У кастрычніку 2014 г. Пантыфік скіраваў спецыяльнае пасланне да ўдзельнікаў агульнаітальянскага форума, прысвечанага праблемам беспрацоўя сярод моладзі, які праходзіў па ініцыятыве мясцовага епіскапату.

Паводле беларускай рэдакцыі Ватыканскага радыё, (IL)

 

Пры выкарыстанні матэрыялаў сайта спасылка на Catholic.By абавязкова.