5-6 снежня ў Лондане пройдзе ІІ Міжнародная канферэнцыя на тэму барацьбы з гандлем людзьмі, у якой прымуць удзел члены так званай «Групы св. Марты» — аб’яднання афіцэраў паліцыі, экспертаў і духавенства з розных краін свету, задзейнічаных у барацьбе з сучасным рабствам.

Яны абмяркуюць супольную стратэгію супрацьдзеяння гэтаму феномену і магчымасці аказання дапамогі яго ахвярам і іх рэінтэграцыі ў грамадства.

Ініцыятарам форуму выступіла Канферэнцыя Біскупаў Англіі і Уэльса, лонданская паліцыя і дэпартамент ураду Вялікабрытаніі, адказны за міграцыйны кантроль, бяспеку і парадак.

«Група св. Марты» абавязана сваёй назвай аднайменнаму дому ў Ватыкане, дзе сёння пражывае Папа Францішак. Тут у красавіку 2014 года праходзіла сустрэча з Пантыфікам удзельнікаў Міжнароднай канферэнцыі на тэму барацьбы з гандлем людзьмі. Тады Папа Францішак назваў гандаль людзьмі і рабства «адкрытымі ранамі на целе сучаснага грамадства» і «злачынствамі супраць чалавечнасці».

Паводле ацэнак Міжнароднай арганізацыі працы, гадавы прыбытак рынку «сучаснага рабства» складае 32 млрд. долараў. Амаль 2,5 млн. чалавек ва ўсім свеце ўжо сталі ахвярамі гандлю людзьмі.